Саха тылын атын омуктар эмиэ үөрэтэллэр. Холобур, Саха сиригэр кэлэн үлэлиир, үөрэнэр, олорор омук ыччата саха култууратын, тылын интэриэһиргээн, төһө да ыарахан буоллар, үөрэтэр. Дьэ, туох сыалтан?
Мишель Ковер, ХИФУ тылга киинин преподавателэ:
— Мин АХШ Калифорния штатыгар улааппытым. Кыра эрдэхпиттэн тоҕо эрэ Арассыыйаҕа барар ыра санаалаах этим. Ол иһин эрдэттэн интэриэһиргээн, нуучча тылын үөрэтэн саҕалаабытым, култууратын, олоҕун-дьаһаҕын үөрэппитим.
Бастаан Москваҕа олорбутум, онтон Саха сирин туһунан билбитим. Кыһын бытарҕан тымныыга хайдах олоруохха сөбүй, тугу кэтэбин эҥин диэн үгүс ыйытыы үөскээбитэ. Кэлээт, балаҕан ыйыгар унтуу атыыласпытым, ол саамай үчүгэй атыылаһыым этэ. Хас да кыһыны туораатым, сатыы сылдьабын, атаҕым тоҥмот. Манна кэлэн баран, айылҕатын, дьонун-сэргэтин таптаабытым, ханна да барыахпын баҕарбатаҕым. Уруккуттан да Москва курдук улахан куораттары буолбакка, кыра соҕус, ураты эйгэлээх сирдэри сөбүлүүбүн.
Саха тыла истэргэ олус кыраһыабай, саха култуурата түҥ былыргы, интэриэһинэй, онон элбэҕи билэргэ дьулуһабын. Аныгы кэмҥэ бэйэ култууратын уонна атын норуоттар култуураларын билии улахан суолталаах дии саныыбын. Мин дьону кытары кинилэр төрөөбүт тылларынан кэпсэтиэхпин баҕарабын. Ол иһин, нуучча тылын үөрэппитим, ол кэнниттэн саха тылын үөрэтэн саҕалаабытым. Биллэн турар, үөрэтэргэ ыарахан, уустук. Билигин тулабар дьон саҥатын өйдүүр буолан эрэрбиттэн олус үөрэбин. Саха доҕотторум миэхэ көмөлөһөллөр.
Манна кэлбитим 5 сыл буолла, ол эрээри биирдэ да 50 кыраадыс тымныы буола илигэ (сорох кыһын дойдубар кыстаабытым, сороҕор -49 буолан кыһытара). Ол иһин быйыл өр кэмҥэ 50 кыраадыстан тахса тымныы буолбутугар, күн аайы үөрэр киһи соҕотох мин этим. Бу – бэйэни тургутуу, саҥа уопут, киһи олоҕор сэдэх көстүү. Ол иһин олус астынабын.
Ангелина Васильева, «Саха сирэ» хаһыат, edersaas.ru
Хаартыскаҕа: Мишель Ковер