Өссө от ыйын 28 күнүгэр Мииринэйгэ “АЛРОСА” хампаанньа “Мир” руднигын шахтатыгар уу киирэн, ыксаллаах быһыы-майгы үөскээн эрэр диэн биллэрбиттэрэ. Ити күн кураанах сиргэ турбут носуостар ууга былдьаммыттара. Ити кэнниттэн уу киириитэ тохтоон, рудникка үлэ салгыы ыытыллыбыта.
Бэҕэһээ, атырдьах ыйын 4 күнүгэр, “Мир” шахтаҕа карьерга баар уу киирэн, улахан саахал таҕыста. Бу кэмҥэ шахтаҕа 150-тан тахса киһи үлэлии сылдьыбыт. Санатар буоллахха, “Мир” карьерга 300 тыһ. тахса куб. уу баар.
Тута “АЛРОСА” АК президенэ Сергей Иванов уонна Ил Дархан Егор Борисов Мииринэйгэ тиийэн быһыыны-майгыны билсэн, саахалы туоратыыга уонна, саамай сүрүнэ, дьону өрүһүйүүгэ кытта сылдьаллар. Атырдьах ыйын 4 күнүн киэһэ 11 чаастааҕы туругунан, шахтаттан 142 киһини өрүһүйбүттэр. Дьону быһааһыҥҥа 100-тэн тахса киһи кытта сылдьар.
“АЛРОСА” АК Мииринэйдээҕи хайа-байытар кэмбинээтин дириэктэрэ Михаил Лопатинскай саахал туохтан сылтахтанан тахсыбыт биричиинэтин бэрэбиэркэлээһин бүтүөр диэри дуоһунаһыттан босхолонно.
Александр ТАРАСОВ, «Саха сирэ» хаһыат, edersaas.ru