«Мир» рудник үлэтэ тохтотулунна эрээри, чинчийии үлэтэ салҕанар
«АЛРОСА» хампаанньа сир аннынааҕы «Мир» рудник үлэтэ тохтотуллубутун туһунан биллэрэр. Ол эрээри, толору уонна дириҥ чинчийии кэнниттэн биирдэ бүтэһиктээх быһаарыныы ылыныллыаҕа.
edersaas.ru
Сир анныгар 1300 миэтэрэ дириҥҥэ киирэн, туох саппаас баарын-суоҕун чинчийэр үлэ 2022 сыл саҥатыгар түмүктэниэҕэ. Итиниэхэ 2019 сыллааҕы инвестбырагырааматтан
2 миллиард солкуобай үп ороскуоттаныаҕа. Өссө 2024 сылга диэри манна күндү тааһы көрдүүргэ скважиналары дьөлө үүттүөхтэрэ. Ону таһынан, рудниктан ууну таһаарарга, саппааһы тиһэҕэр диэри туттарга, шахтаны салгылатарга үлэ барыаҕа.
Өскөтүн «Мир» руднигы чөлүгэр түһэрэр оруннааҕа билиннэҕинэ, тутуу 6-8 сыл тухары ыытыллыаҕа. Чинчийии күндү таас баарын көрдөрдөҕүнэ уонна бырамыысыланнаска куттала суох буолууну үрдүк таһымнаахтык хааччыйар кыах баара чуолкайданнаҕына, 2024 сылтан айылҕа баайдаах сири сөргүтэн, «иккис тыынын» киллэриэхтэрэ. Итиниэхэ бырайыак экэнэмиичэскэй өттүнэн барыстаах буолара уонна сир анныгар шахтаҕа киирэн үлэлиир дьоҥҥо куттал суоһаабата болҕомто киинигэр тутуллуо.
Марианна ТЫРТЫКОВА, «Саха сирэ» хаһыат, edersaas.ru