Биэнсийэни уонна атын социальнай төлөбүрдэри “Мир” каартаҕа эрэ түһэрии болдьоҕо 2021 сыл от ыйын 1 күнүгэр диэри уһаата. Арассыыйа Баана пандемиянан сибээстээн, сааһырбыт дьон дьиэлэригэр олороллоро ирдэнэринэн, болдьоҕу уһатабыт диэн быһаарда. Онон билигин биэнсийэлээх ханнык баҕарар каартатыгар биэнсийэтэ түһэр.
Санаттахха, биэнсийэлээхтэр үгүстэрэ “Мир” каартаҕа көспүттэрэ. Ол эрээри, дьиэҕэ бэйэни хааччахтаныы эрэсиимигэр олорор биэнсийэлээхтэр бааллар, кинилэр саҥа каартаны кыайан оҥорторбокко сылдьаллар. Ол иһин сорох бааннар “Мир” каартаны дьиэҕэ илдьэн биэрэр өҥөнү оҥороллор. Маны тэҥэ, биэнсийэлээхтэр каартаҕа эрэ буолбакка, буоста нөҥүө, эбэтэр счекка түһэртэрэн, ылыахтарын сөп.
Ханнык баҕарар бааҥҥа тиийэн, социальнай төлөбүрдэргэ анаан “Мир” каартаны оҥорторобун диэтэххэ, каартаны сыллааҕы туһаныы буор-босхо буолар.
Аан бастаан “Мир” каартаҕа көһүү 2020 сыл от ыйын 1 күнүнэн бүтүөхтээх этэ. Пандемиянан сибээстээн, бу болдьоҕу хаста да көһөрдүлэр.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.