Минскэйгэ Александр Медведь турнирыгар Саха сириттэн тоҕус тустуук кыттыаҕа
Балаҕан ыйын 15-17 күннэригэр Минскэйгэ 51-с төгүлүн көҥүл тустууга Олимпиада үс төгүллээх чөмпүйүөнүн Александр Медведь бирииһигэр норуоттар икки ардыларынааҕы Гран-при кылаастаах турнир ыытыллыаҕа.
Саха сирин тустууга оскуолатын тоҕус иитиллээччитэ кыттыаҕа. Бу туһунан «Спорт Якутии» сайтка Саха сирин сүүмэрдэммит хамаандатын сүрүн тириэньэрэ Александр Оконешников иһитиннэрдэ: «Күрэхтэһиигэ Белоруссия аатыттан тустар Арыйаан Тютрин, Андрей Бекренев, Ньургун Скрябин кыттыахтара, кинилэри таһынан биһиги хамаандабыт алта тустууга Уйгулан Иванов, Харысхал Григорьев, Петр Копылов, Ньургун Сергин, Андрей Аронов уонна Никита Хабаров».
«Александр Медведь» Гран-при турнирга Арассыыйа сүүмэрдэммит хамаандата икки састаабынан кыттыаҕа. Онно олимпийскай чөмпүйүөннэр Заур Угуев, Заурбек Сидаков уонна Абдулрашид Садулаев бааллар. Дагестан өрөспүүбүлүкэтэ туспа хамаанда туруорара күүтүллэр.