Минньигэс килиэбинэн хааччыйар Анатолий Киселев

Ааптар: 
Бөлөххө киир:

Хоту дойдуга урбаанньыттар көмөлөрүнэн олороллор диэтэххэ сыыстарбаккын. Аллайыахаҕа олорор урбаанньыт туһунан манна ааҕыҥ.

Тас дойдулар хааччахтааһыннарын кэмигэр бэйэ бородууксуйатынан хааччыйыы бастакы уочараттаах соругунан буолар. Арктикаҕа киирсэр Аллайыаха улууһугар Чокуурдаах бөһүөлэгэр олохтоох бэкээринэ таһаарыылаахтык үлэлиир. Бу бэкээринэни “Киселев А.П.” ИП бэркэ салайан,   таһаарыылаахтык үлэлиир.

Аллайыаха улууһун барытын кэриэтэ килиэбинэн хааччыйабыт. Нэһилиэктэртэн даҕаны кэлэн хото  атыылаһаллар. Ыйга 7 туонна килиэби астыыбыт. Бурдукпутун “Якутоптторг” тэрилтэттэн оптовай сыананан атыылаһабыт. Ол бурдугу бу тэрилтэ бэйэтэ манна аҕалар. Килиэби таһынан бурдук ас арааһын астаан, нэһилиэнньэҕэ атыылыыбыт. Холобура, араас пирожнайдары, туортары, балык бөрүөгүн, хот-догка тиийэ астыыбыт. Ону, мин санаабар, олохтоохтор биһирииллэр. Мин тэрилтэм аһын ордук үлэлии кэлбит дьон сөбүлүүллэр. Ону сэргэ араас күрэхтэһиилэргэ, тэрээһиннэргэ кыахпыт тиийэринэн көмөлөһө сатыыбыт. Оҕо көмүскэлин күнүгэр улахан туорт оҥорон биэрбиппит. Быһата, улуус олоҕор көхтөөхтүк кыттабыт. Аҕыс үлэһиттээхпин (атыылааччылар, биэкэрдэр, оробуочай). Онон үлэ миэстэтинэн эмиэ хааччыйабын дии саныыбын, — диэн кэпсээтэ Анатолий Петрович.

Бэкээринэ 1971 с. тутуллубут дьиэҕэ үлэлиир. Биллэн турар, дьиэ-уот эргэрдэҕэ дии. Ол эрээри сатабыллаах салайааччы биир да күн килиэбинэн хааччыйыыны тохтоппот, быыс-хайаҕас булан үлэлииллэр. Дьиҥэ, килиэп, бурдук ас буһарар тэриллэри саҥардыахха баар эбит. Ону бу дьоҕус биирдэм урбаанньыт бэйэтин эрэ күүһүнэн кыайара уустук, кыра нэһилиэнньэлээх сиргэ дохуота да олус улахан буолбатаҕа чахчы. Сыыйа дьиэни-уоту өрөмүөннээбит киһи диэн баҕалаах үлэлии олорор хоту дойду хорсун урбаанньыта Анатолий Киселев.  Онон бэйэ бородууксуйатын ыарахаттартан чаҕыйбакка оҥоро, хааччыйа олорор  урбаанньыты өйүөхтэрин наада. Урбаан министиэристибэтэ, Арктика министиэристибэтэ эҥин  көмөлөстөллөр бэрт буолуо эбит. Оттон Чокуурдаах килиэбин биирдэ амсайбыт киһи куруук бу эрэ килиэби сиэн баҕарар.

Бэлэмнээтэ Женни Стрюкова

Хаартыска: А.П.Киселев ыытта.

+1
0
+1
0
+1
0
+1
0
+1
0
+1
0
+1
0