2009 сылтан саҕалаан Ил Дархан Егор Афанасьевич Борисов көҕүлээһининэн ыытыллар дьыалабыай оонньуу ыччат ортотугар быйыл онус төгүлүн тэриллиэҕэ. Араас сыллардааҕы дыалабыай оонньуулар түмүктэринэн өрөспүүбүлүкэ вице-бэрисидьиэнэ, вице-премьерэ, хас даҕаны миниистир, миниистири солбуйааччылар, улуус, нэһилиэк баһылыктара, баһылыктары солбуйааччылар, бөдөҥ хампаанньалар салайааччылара анаммыттара. edersaas.ru
Быйылгы оонньуу кулун тутар 29-31 күннэригэр Хаҥалас улууһун Чапаево сэлиэнньэтигэр баар Наука академиятыгар буолуоҕа. Бу сыллааҕы “Министр” оонньууга кыттыан баҕалаах эдэр исписэлиистэр уонна устудьуоннар сайаапкаларын ааспыт сыл ахсынньытыттан түһэрсибиттэрэ. Маныаха сайаапкаласпыт 526 киһи Үрдүкү инновационнай менеджмент оскуолатын күүстээх сүүмэрдээһинин ааста. Онон, финалга 112 киһи киирдэ.
Бастакы түһүмэххэ кыттааччылар Саха сирин, Арассыыйа устуоруйатын, сокуоннары, өрөспүүбүлүкэбит социальнай экономическай балаһыанньатын төһө билэллэрин тургуттулар. Иккис түһүмэххэ салайар үлэҕэ төһө билиилээхтэрин, сайдыылаахтарын билэр сыалтан, “Арассыыйа лидердэрэ” куонкуруска туһаныллыбыт тургутуктары толордулар. Үһүс түһүмэххэ хамаанданан бырайыак көмүскээтилэр. Маны таһынан, эрэгийиэннэринэн түһүмэхтэр эмиэ буоллулар. Ол курдук, Дьокуускайга, Чурапчыга, Сунтаарга, Нерюнгрига, Өймөкөөҥҥө үрдүк көрдөрүүлээх оонньуулар буоллулар. Өрөспүүбүлүкэтээҕи оонньууга кыттар быраабы ылбыт ыччаты таһынан өрөспүүбүлүкэтээҕи “Профессия — ЖИЗНЬ”, “Мин – ИНЖЕНЕРБИН”, “Бастыҥ эдэр финансист” уонна “Бас билиини салайыы” куонкурустар кыайыылаахтара, финалистара кыттыахтара.
Айтана АММОСОВА, «Саха сирэ» хаһыат, edersaas.ru