Уопсастыба

«Министр» дьыалабыай оонньууга сайаапкалары бэс ыйын 20 күнүгэр диэри туталлар

Бэҕэһээ, ыам ыйын 29 күнүгэр, Инновационнай менеджмент үрдүкү оскуолатыгар «Министр» дыалабыай оонньуу презентацията буолла. Бу сылга оонньуу формата уларыйда.

Ыччат дьыалаларыгар уонна социальнай коммуникацияларга миниистир Степан Саргыдаев бэлиэтииринэн, финалистар сайдалларыгар араас кыах баар буолла. Ол курдук, дойду киин үөрэхтэригэр куурустары ааһыахтара, үөрэниэхтэрэ. Маны таһынан, бастыҥнар өрөспүүбүлүкэ каадырдарын резервэтигэр киириэхтэрэ.

Дьыалабыай оонньууга 16-45 саастаах дьон кытталлар. Кыайыылаахтары үс категорияҕа арааран быһаарыахтара: 16-22 саастаахтар, 23-30 саастаахтар, 31-45 саастаахтар. Кыайыылаахтар «Артек», «Сириус» кииннэргэ, Москватааҕы судаарыстыбаннай университекка, Соҕуруу Кореяҕа баар  SolBridge диэн норуоттан икки ардыларынааҕы урбаан оскуолатыгар,  Массачусетстааҕы технологическэй институкка  стажировкаланыахтара.

Инновационнай менеджмент үрдүкү оскуолатын ректора Ольга Сукуева этэринэн, саҥа сезоҥҥа кыттааччылар тус сайдыыларыгар уонна лидердии хаачыстыбаларыгар болҕомто ууруллуоҕа.

«Министр» дьыалабыай оонньууга сайаапкалары бэс ыйын 20 күнүгэр диэри  https://kadry.sakha.gov.ru/games/27 туталлар.  Оонньуу туһунан сиһилии министр2019.рф саайтан ааҕыҥ.

Саха Өрөспүүбүлүкэтин Ил Дарханын уонна

Саха Өрөспүүбүлүкэтин Бырабыыталыстыбатын пресс-сулууспата.

0
0

Добавить комментарий