РФ Үөрэҕириигэ министиэристибэтэ уһун өрөбүллэргэ үөрэнээччилэргэ күһүҥҥү сынньалаҥы биллэриҥ диэн эрэгийиэннэргэ сүбэлиир суруктары ыыталаата.
Дойду бэрэсидьиэнэ алтынньы 30 күнүттэн сэтинньи 7 күнүгэр диэри хамнаһы хаалларан туран уһун өрөбүллэри (нерабочие) биллэрбитэ. Онон сибээстээн, РФ Үөрэҕириигэ министиэристибэтэ бу кэмҥэ оскуола үөрэнээччилэрин күһүҥҥү сынньалаҥҥа ыытыҥ диэн эрэгийиэннэргэ сүбэлиир. Саха сиригэр ыйыллыбыт болдьох кэмигэр үгүс оскуолаларга уочараттаах биир нэдиэлэлээх сынньалаҥ (каникул) буолара. Онон үөрэххэ сүүйтэрии улаханнык тахсыбата биллэр.
Ону тэҥэ, дойду министиэристибэтэ кэллиэс устудьуоннарын эмиэ сынньалаҥҥа (каникулга) ыытыаххытын сөп диэн суруйбут.
Онтон үлэлиир төрөппүттэр оҕолорун уһуйааннарга сырытыннаралларын курдук, дьуһуурунай бөлөхтөр испииһэктэрин оҥорон иһитиннэрэллэригэр сүбэлииллэр. Маныаха санитарнай-эпидемиологическай быраабыла булгуччу тутуһуллара ирдэнэр.
Людмила ПОПОВА, “Саха сирэ” хаһыат, edersaas.ru
Хаартыска: СИА