Хамсыгынан сибээстээн, Саха сирин оскуолалара олоҕурбут (очно) көрүҥүнэн уонна ыраахтан олорон (дистанционно) үөрэнэргэ күһэлиннилэр. Эксээмэннээх оҕолордоох төрөппүттэр ыраахтан олорон үөрэниини биһирээбэттэрэ биллэр.
edersaas.ru
Биллэн турар, киһи өйүгэр баппат эрээри, балаҕан ыйын 1 күнүгэр — Билии күнүгэр Ленин болуоссатыгар оскуола форматын тэлгээбит уонна сибэкки уурбут хаартыскалара социальнай ситимнэринэн тарҕаммыта. Ити, төрөппүттэр ыраахтан олорон (дистанционно) үөрэтиини утаралларын бэлиэтэ диэн суруйбуттар этэ.
СӨ Үөрэҕин уонна наукатын министиэристибэтин социальнай ситимнэригэр атырдьах ыйын 28 күнүттэн – балаҕан ыйын 1 күннэригэр нэһилиэнньэттэн 60 ыйытыы, туһаайыы киирбит. Бу туһунан министиэристибэ саайтыгар суруллар.
“2020 сыл балаҕан ыйын 1 күнүгэр социальнай ситимнэргэ уонна араас мессенджердэргэ оскуола форматын хаартыската таҕыста. 5-11 кылаас үөрэнээччилэрин төрөппүттэрэ үөрэҕи олоҕурбут көрүҥүнэн (очно) тэрийэри туруорсан кэммэнтээрийдээбиттэр. СӨ Үөрэҕин уонна наукатын министиэристибэтэ өрөспүүбүлүкэҕэ барытыгар үөрэҕи олоҕурбут көрүҥүнэн (очно), ол эрээри, сорох түгэннэргэ хос бөлөхтөргө (подгруппы) араартаан (булкаас ньыманы туһанан) ыытарга сүбэлээбитэ. Хамсык түгэнэ бэлиэтэммэтэх 27 улуус үөрэҕи олоҕурбут көрүҥүнэн (очно) саҕалаата.
Хамсык тарҕанар куттала баар нэһилиэктэригэр улуус уонна куорат уокуругун баһылыктара туспа быһаарыылары ылыммыттара.
Хамсык тарҕаныытын бохсор уонна үөрэх кыттыылаахтарыгар куттала суох усулуобуйаны олохтуур инниттэн, маннык нэһилиэнньэлээх пууннарга СӨ Үөрэҕин уонна наукатын министиэристибэтэ 1-кы, 2-с, 3-с, 4-с, 9-с, 11-с кылаастары олоҕурбут көрүҥүнэн (очно) үөрэтэргэ сүбэлээбитэ. Онтон атын кылаастарга булкаас ньыманы туһанан, ол эбэтэр, сорох уруоктары оскуолаҕа, сороҕун ыраахтан олорон (дистанционно) үөрэтэргэ эппитэ.
Ону тэҥэ, санитарнай-эпидемиологическай ирдэбили тутуһарга кэккэ миэрэлэр ылыллыбыттара: ситимин быспакка оскуоланы дезинфекциялааһын, салгыны эмтээһин (обеззараживание), оскуолалары тус харыстанар сириэстибэлэринэн хааччыйыы, оҕолор бэйэ-бэйэлэрин кытта быһа ааспаттарын туһугар усулуобуйа олохтооһун, хас биирдии кылааска анал кэбиниэти анааһын”, — диэн СӨ Үөрэҕин уонна наукатын министиэристибэтин саайтыгар суруллар.
Онон улууска, Дьокуускай куоракка оҕолор хайдах үөрэнэллэрин балаһыанньаттан көрөн баһылыктар быһаараллар. Биллэн турар, социальнай ситимнэргэ тарҕаммыт санаалартан көрдөххө, дьон санаата араас. Ким эрэ оҕолор ыарыыны хабыахтара диэн сэрэхэдийэр. Ким эрэ эксээмэннээх 11-с кылаастары, бырагырааматтан хаалбат туһугар, олоҕурбут көрүҥүнэн (очно) үөрэтиэхтэрин сөп этэ диир. Түмүгүн эһиил баччаларга билиэхпит турдаҕа.
Людмила ПОПОВА, “Саха сирэ” хаһыат, edersaas.ru