Миниистири бастакы солбуйааччы Феодосия Габышева дуоһунаһыттан босхолонно
Үөрэх уонна наука миниистирин бастакы солбуйааччы Феодосия Габышева Саха Өрөспүүбүлүкэтин норуотун дьокутаатынан талыллыбытынан сибээстээн, дуоһунаһыттан босхолонно.
Ити туһунан ыйаахха Ил Дархан эбээһинэһин быстах кэмҥэ толорооччу Айсен Николаев балаҕан ыйын 14 күнүгэр илии баттаата.
Феодосия Габышева, бэҕэһээ, биллиилээх судаарыстыбаннай диэйэтэл Семен Сюльскай төрөөбүтэ 110 сылыгар аналлаах уопсастыбаннас мунньаҕар: “Миниистир быһыытынан Семен Сюльскай олоҕун, үлэлэрин үөрэтэн баран, биир түгэни бэлиэтиэхпин баҕарабын. Кинини икки төгүл үөрэх миниистиринэн анаабыттара, мин бэйэм олохпор эмиэ оннук буолуо диэн хаһан даҕаны санаабатаҕым. Ол гынан баран эмиэ Семен Сюльскай курдук икки төгүл миниистиринэн ананан үлэлээтим”, — диэн бэлиэтээн эттэ. Ол курдук, Феодосия Васильевна 2003-2010 сс., 2014-2016 сс. үөрэх миниистиринэн, 2016 сылтан миниистири солбуйааччынан үлэлээтэ. Билигин кини оннугар бастакы солбуйааччынан ким буоларын кэтэһэбит.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.