Эрэгийиэннэр вирус суоһууруттан өйүүр саҥа кыахтары тобуллулар.
Саҥа коронавирус уолуйууну уонна кутталы үөскэтэрин таһынан чэбдигирдэр дьайыыланна. Уопсай иэдээн сомоҕолоото. Ыаллыылары уонна биир идэлээхтэри эрэ буолбакка, норуоту кытта былааһы эмиэ. Эрэгийиэн бырабыыталыстыбата автопаркатын эмчиттэргэ биэрэр. Дьокутааттар көмөлөһөргө саппаас биригээдэлэргэ суруйтараллар. Холобур, Краснодар кыраайыгар “Вольное дело” пуонда волонтердара биэнсийэлээхтэргэ аһылык нобуорун бэлэмнииллэр.
Саха сирин миниистирдэрин уонна дьокутааттарын массыыналарыгар эмчиттэр олорустулар. Эмчиттэр массыыналары Дьокуускайга ыҥырыыга барарга туһаналлар. Саха сирин Ил Дархана Айсен Николаев ыйааҕынан массыыналары суоппардарын кытта поликлиникаларга сыһыардылар.
“Үгүс анаалыһы оҥоруохха наада, — бэлиэтээтэ эрэгийиэн баһылыга. – Эмчиттэргэ элбэх массыына наада. Ол иһин маннык быһаарыныы ылынным. Бу балаһыанньаны хонтуруолга тутарга көдьүүһү аҕалыа диэн эрэнэбин”. Маны сэргэ былаас 65 саастарыттан үөһээ саастаахтары дьиэттэн тахсыбакка олороллоругар дьаһайда.
“Яндекс.Такси” Казаҥҥа суһал көмөҕө массыыналарын биэрдэ. Оттон Юграҕа аҕа саастаах дьону босхо бородууктанан хааччыйарга быһаардылар. Бородууктаны волонтердар таһыахтара. Эрэгийиэҥҥэ “суһал линия” үлэлиир.
Карелия дьокутааттара эмчит буоларга бэлэмнэр. Сокуону оҥорор мунньах бэрэссэдээтэлэ Элиссан Шандалович уонна доруобуйа харыстабылын кэмитиэтин баһылыга Алексей Хейфец реанимацияҕа үлэлииргэ баҕаларын биллэрдилэр. Кинилэр иккиэн анестезиолог-реаниматор быраас сэртипикээттээхтэр. “Коронавирус инфекциятыттан туруктара ыараабыт ыарыһахтары быыһыырга анестезиолог-реаниматордар оруоллара улахан”. – диэтэ Элиссан Шандалович.
Елена Мационг, Владимир Таюрскай, Светлана Цыганкова
Российская газета — Неделя 70(8124) №-рэ
Кылгатан бэлэмнээтэ Женни Стрюкова, “Саха сирэ” хаһыат.
Хаартыска: интэриниэттэн