Ил Дархан Айсен Николаев бүгүҥҥү Ыйааҕынан СӨ баайга-дуолга, сир сыһыаннаһыыларыгар миниистирин бастакы солбуйааччынан Ньургустаана Николаевна Пахомова уонна СӨ тырааныспарга, суол хаһаайыстыбатын миниистирин бастакы солбуйааччынан Анатолий Константинович Потапов ананнылар.
Ньургустаана Пахомова 1993 с. Омскайдааҕы тыа хаһаайыстыбатын институтун үөрэнэн бүтэрбитэ. 2012 с. РАНХиГС-ка кэтэхтэн «юрист» идэтин баһылаабыта. Ньурба оройуонун сир реформатын уонна ресурсатын кэмитиэтигэр үлэтин саҕалаабыта. 2001 с. сир ресурсатын уонна землеустройство кэмитиэтин исписэлииһинэн, 2002 с. – «Земельная служба» ГУП сүрүн исписэлииһинэн, 2002 -2011 сс. Баай-дуол сыһыаннаһыыларга министиэристибэтигэр араас дуоһунастарга үлэлээбитэ. 2011 сыллаахха министиэристибэ сир сыһыаннаһыыларга департаменын салайааччытынан анаммыта. 2016 с. — миниистири солбуйааччы.
Анатолий Потапов 2002 с. СГУ-ну, 2007 с. – ДВАГС-ы, 2019 с. – Тихоокеанскай государственнай университеты бүтэрбитэ.
Горнай улууһун Малтааны нэһилиэгин администрациятын бухгалтерынан үлэтин саҕалаабыт. Пенсионнай сулууспа управлениетыгар, улуус үөрэҕириитин управлениятын бухгалтерынан, Горнай улууһун экономическай управлениятын салайааччытынан, Горнай улууһун баһылыгын экономикаҕа уонна үпкэ солбуйааччытынан үлэлээбитэ. 2008 с . Дьокуускай куорат администрациятын Бырамыысыланнаска уонна урбааҥҥа кэмитиэтин, кэлин урбааҥҥа, бырамыысыланнаска, тырааныспарка салаатын салайбыта. 2010 с. Упрдор «Вилюй» ФКТ суолга куттала суох буолууну тэрийэр отдел начаалынньыганан үлэлээбитэ. Ити сыл министиэристибэҕэ кэлэн, араас дуоһунастарга үлэлээн, Суол сулууспатыгар уонна автомобильнай тырааныспарга Департамент салайааччытын солбуйааччыта дуоһунаһыгар тиийэ үүммүтэ. 2015 с. — «Управление автомобильных дорог РС (Я)» тэрилтэ суол туруктаах буолуутун хааччыйар отделын начаалынньыга. 2016 с. — СӨ суолларын управлениятын генеральнай дириэктэрин солбуйааччы.
Александр Тарасов, «Саха сирэ» хаһыат