![](https://edersaas.ru/wp-content/uploads/2017/05/Gotov-EGE-2-1.jpg)
Бэҕэһээ СӨ үөрэҕин уонна наукатын миниистирэ Владимир Егоров сүрүн түмүктүүр судаарыстыбаннай аттестация иннинэ (ГИА) Үөрэх хаачыстыбатын кэтээн көрөр кииҥҥэ (Центр мониторинга качества образования) сырытта.
Людмила ПОПОВА, edersaas.ru
Соторутааҕыта тустаах киин 1308 кв.м. иэннээх Гоголь уулуссатын 1 №-дээх дьиэтигэр көспүтэ. Миниистир саҥа дьиэни көрдө-иһиттэ. Бу туһунан министиэристибэ саайтыгар суруллар.
СӨ Үөрэх хаачыстыбатын кэтээн көрөр киин өрөспүүбүлүкэҕэ биир кэлим судаарыстыбаннай эксээмэн (БКЭ) уонна сүрүн судаарыстыбаннай эксээмэн бары матырыйаалларын барытын бэрийэр. Быйыл 244 биир кэлим эксээмэни ыытар пуун, 344 сүрүн судаарыстыбаннай эксээмэни ыытар пуун үлэлиэҕэ. Кинилэр илиилэрин иһинэн 80 тыһ. тахса эксээмэн үлэтэ ааһар. Маныаха 500 эспиэр сыһыарыллыаҕа. Киин баазатыгар СӨ үөрэҕин уонна наукатын министиэристибэтин Ситуационнай киинэ үлэлиэҕэ.
Тустаах киин дириэктэрэ Надежда Попова миниистиргэ саҥа дьиэҕэ хайдах үлэлээн эрэллэрин сиһилии кэпсээтэ, көрдөрдө. Эксээмэн матырыйааллара киириэхтээх, сканируйданыахтаах, эксээмэн туттарааччы аатын-суолун (верификация), тэнитиллибит үлэни бэрэбиэркэлиир хостору көрдөрдө. Киин наадалаах тэрилинэн барытынан хааччыллан олорор. Эксээмэн үлэтэ барыта Рособрнадзор ирдэбилигэр эппиэттиир. Миниистир маны барытын илэ хараҕынан көрөн-истэн баран, Киин буолаары турар эксээмэннэргэ чахчы бэлэм эбит диэн итэҕэйдэ.
Людмила ПОПОВА, edersaas.ru
Матырыйаал уонна хаартыска СӨ үөрэҕин уонна наукатын министиэристибэтин саайтыттан туһанылынна.