Миниистир устудьуоннар, аспираннар ыйытыыларыгар хоруйдаата

РФ Наукаҕа уонна үрдүк үөрэххэ миниистирэ Михаил Котюков Хотугулуу-Илиҥҥи федеральнай университет, Тыа хаһаайыстыбатын судаарыстыбаннай академиятын, Арктикатааҕы култуура уонна искусство судаарыстыбаннай институтун, Муусука үрдүкү оскуолатын устудьуоннарын, аспираннарын кытта көрүстэ, ыйытыыларга хоруйдаата.

Тэрээһиҥҥэ СӨ Ил Дархана Айсен Николаев, Арассыыйа Наукаларга академиятын Сибиирдээҕи салаатын бэрэссэдээтэлэ Валентин Пармон, М.К.Аммосов аатынан Хотугулуу-Илиҥҥи федеральнай университет ректора Анатолий Николаев кытыннылар.

Устудьуоннар, аспираннар миниистиргэ биэрбит ыйытыыларыгар толору хоруйдары ыллылар. Ол курдук, эдэр учуонайдары дьиэнэн хааччыйыы, хоту аҕыйах ахсааннаах норуоттар устудьуоннарыгар социальнай босуобуйа, үөрэх куорпуһун, лабораториятын тутуу, аспирантураҕа бүддьүөт миэстэтин, оробуочай исписээлинэстэргэ үөрэнии, уо.д.а. ыйытыылары биэрдилэр.

Ол курдук, ХИФУ историяҕа факультетын аспирана эдэр учуонайдары дьиэнэн хааччыйыы куонкуруһун усулуобуйатыгар олоҕуран, хандьыдаат 35-гэр, дуоктар 40-гар диэри саастаах итиэннэ ыстааһа 5 сылтан кыра буолуо суохтаах диэн ирдэнэр диэтэ. Итиэннэ кини саастарын туһааннааҕынан 40-ҥа уонна 45-кэ диэри үрдэтиэххэ, оттон ыстааһын 3 сылга диэри аччатар кыаллар дуо диэн ыйытта. Тустаах ыйытыыга дойду наукаҕа уонна үрдүк үөрэххэ миниистирэ эдэр учуонайдарга сэртипикээттэри көрүү, федеральнай бырагыраама иитиниэн барарын ыйда. Ыстааһы намтатыыны кэллиэгэлэрбитин кытта ырыта сылдьабыт, оттон сааһы уһатан биэрии туһунан билиҥҥитэ былааннаабаппыт диэн хоруйдаата.

Салгыы 2-с куурус устудьуона аҕыйах ахсааннаах хотугу норуоттар устудьуоннарыгар социальнай босуобуйа көрүллэрэ, ол билигин суох, төлөбүрү төнүннэриэхтэрэ дуо диэн ыйытта. Онуоха миниистир: “Суолталаах ыйытыы. Министиэристибэ уларытыыны киллэрбэтэҕэ. Хоту сир аҕыйах ахсааннаах норуоттарын өйөөһүн сокуонунан бу – эрэгийиэн соруга. Национальностар дьыалаларыгар федеральнай агенствоҕа бүддьүөттэн анал субсидия көрүллэр, олору бу курдук бырагыраамалары өйүүргэ эрэгийиэннэр бүддьүөттэригэр биэрэллэр. Соторутааҕыта дойду бэрэсидьиэнэ нациялар икки ардыларынааҕы сэбиэт мунньаҕын ыыппыта, тустаах боппуруоһу онно ырыппыттара. Эрэгийиэннэр бырагыраамаларын кээмэйин көрүөххэ сөп буолуо, ону кытта, итинник бырагыраамалары олоххо киллэрэргэ, федеральнай өйөбүлү, кыаллар буоллаҕына улаатыннарыахха сөп диэн этиллибитэ”, — диэн хоруйдаата.

Миниистири кытта көрсүһүү туһунан сиһилии “Саха сирэ” хаһыат кэлэр нүөмэригэр ааҕыҥ.

Людмила ПОПОВА, “Саха сирэ” хаһыата, edersaas.ru

Мария ВАСИЛЬЕВА (СИА) хаартыскаҕа түһэриитэ.