Хамнаска хотугу эбилиги суох гынар туһунан кэпсэтии барбыта ыраатта. Соторутааҕыта РФ Үлэҕэ, социальнай сайдыыга миниистирэ Максим Топилин Ханты-Мансийскайга бара сылдьан, биир мунньахха бу туһунан санаатын эттэ.
Кини этэринэн, дойдуга 25 сыллааҕыта олохтоммут хамнаска хотугу эбилик уонна оройуон коэффициеннарын систиэмэтэ эргэрбит, билиҥҥи олоххо сөп түбэспэт. Холобур, Москваҕа табаар, бородуукта сыаната хоту дойдуга курдук үрдүк, ол эрээри, манна хамнас эмиэ үрдүк.
Ол эрээри министиэристибэ уонна Арассыыйа бырабыыталыстыбата ити систиэмэни уларытар санаалара суоҕун туһунан Максим Топилин тоһоҕолоон бэлиэтиир.
— Хамнаска хотугу эбилик уонна оройуон коэффициеннара учуоттанан ааҕылла сылдьаллар. Оттон дьон хамнас кыччыырын ыарыылаахтык ылынарын өйдүүбүт. Онон хамнаска хотугу эбиликтэри уонна оройуоннааҕы коэффициеннары тыытыахпыт суоҕа, — диэн кини эрэннэрэр.
Хоту дойдуга тыйыс усулуобуйаҕа олорон, киһи кыһыҥҥы таҥаска, эмкэ эбии ороскуотурарын, иҥэмтиэлээх аска-үөлгэ наадыйарын, дьиэ-уот сыаната, бырайыас ыараханын, о.д.а. туһунан федеральнай миниистир тыл быктарбатах. Дьиҥинэн, бу сүрүн төрүөт буолуохтаах этэ.
Ангелина Васильева, “Саха сирэ” хаһыат, edersaas.ru