Миниистир Елена Волкова 3-7 саастаах оҕолорго көрүллэр босуобуйа саҥа быраабылаларын туһунан кэпсээтэ

Муус устар 8 күнүгэр  СӨ үлэҕэ уонна социальнай сайдыыга миниистирэ Елена Волкова бырабыыталыстыба Инстаграмҥа баар сирэйиттэн 17:00 чааска быһа эпииргэ тахсан нэһилиэнньэни кытта кэпсэттэ. Эпиир сүрүн тиэмэтинэн 3-7 саастаах оҕолоох ыалларга төлөбүрдэр саҥа быраабылалара, дьиэ кэргэни өйөөһүҥҥэ сокуон уларыйыылара буолла.

edersaas.ru

Муус устар 1 күнүттэн 3-7 саастаах оҕолордоох ыалларга төлөбүрдэри саҥаттаан ааҕыы саҕаламмыт. “Бу төлөбүрдэри оҥорууга биллэр уларыйыылар тахсыбыттарынан сибээстээн, маннык быһаарыылар туһалаах буолуохтара”, —  диэн миниистир эбэн эттэ.

Бу босуобуйаны ылыыга 50 тыһыынча кэриҥэ түспүт сайаапка бигэргэммит.

— Сайаапкалары саҥаттан ылыы саҕаламмыта бу босуобуйа кээмэйэ лаппа улааппытынан быһаарыллар. Дойду бэрэсидьиэнэ Владимир Путин ыйааҕынан бу төлөбүрү ыларга үс кэрдиистээх систиэмэ олохтонно. Алын кэрдиис төлөбүр 50% саҕаланар. Уларыйыылар туһунан этэр буоллхха, сүрүннэрэ манныктар. Бастататан туран, муус устартан босуобуйа кээмэйэ  ыал илиигэ ылар дохуотуттан тутулуктаах буолар. Иккиһиэн, ыал бас билэр баайа учуоттанар, холобур икки кыбартыыралаах (дьиэ уопсай иэнэ эмиэ учуоттанар), иккиттэн элбэх массыыналаах буоллахтарына, босуобуйа кээмэйигэр дьайар.

Өссө биир уларыйыы — босуобуйа кээмэйин сайаапка түспүт кэмигэр бигэргэммит прожиточнай минимумтан ааҕааһын буолуоҕа. 2020 сылтан Саха Өрөспүүбүлүкэтигэр саҥа олохтоммут прожиточнай минимумтан босуобуйа кээмэйэ ааҕыллар, — диэн сиһилии кэпсээтэ.

Үгүс ийэлэри долгутар ыйытыы: “Билигин ити босуобуйаны ыла сылдьар дьон, перерасчет оҥорууга сайаапканы хаһан түһэриэххэ сөбүй?”. Елена Волкова бу ыйытыыга маннык хоруйдаата:

— Билигин ыла сылдьар босуобуйаны саҥаттан ааҕыы төлөбүр биир сылыттан саҕаланыан сөп. Ол эбэтэр, холобур, эһиги ааспыт сыл балаҕан ыйыттан босуобуйаны ыла сылдьар буоллаххытына, бу сыл балаҕан ыйыгар саҥа сайаапка түһэрэн, саҥа уларыйыылары учуоттуур төлөбүргэ көһүөххүтүн сөп. Саҥа төлөбүрү кэлэр 12 ыйга ылар буолаҕыт.

Ону таһынан социальнай хантараак быһыытынан судаарыстыба көмөтүн биэрии уларыйбытын туһунан кэпсээтэ. Биһиги өрөспүүбүлүкэтигэр бу төлөбүр уон сыл устата “пилотнай бырайыак” быһыытынан үлэлээбит эбит буоллаҕына, бу сылтан социальнай хантараак Арассыыйа үрдүнэн үлэлиир буолбут, онон араас эрэгийиэннэргэ кээмэйэ биир кэлимсэ буолбут. Бу көмө чэрчитигэр “үлэ көрдөөһүн” диэн салаа эбиллибит. Үлэ көрдүү сылдьар киһи социальнай көмүскэл салалтатыгар сайаапка түһэрэн социальнай хантараак быһыытынан көмө ылыан сөп. Холобур, үс ыйдаах үөрэх кэмигэр стипендия быһыытынан харчы ылар бырааптаах.

Сүрүн дакылаат кэнниттэн быһа эпиир кыттааччылара миниистиргэ ыйытыыларын биэрдилэр. Маҥнайгы ыйытыы детдомтан оҕону ылаары сылдьар ыалтан киирбитэ. Оҕону ылыы бэрээдэгэ уонна судаарыстыба бу ыалга тугунан көмөлөһөрүн туһуан Елена Волкова сиһилии быһааран бирбитэ. Кэпсэтии үксүн 3-7 саастаах оҕолорго ананар босуобуйа туһунан чуолкайдыыр ыйытыылартан турбута. “Ханнык дохуоттар учуоттаналларый?”, “Саҥаттан ааҕыы хайдах быһыылаахтык ыытылларый”, “Туох докумуоннар ирдэнэллэрий?” уонна да атын ыйытыыларга Елена Александровна сиһилии ырытан биэрдэ. Быһа эпиир биир чаас кэриҥэ салҕаммыта, элбэх ыйытыыларга хоруй бэриллибитэ.

«Саха сирэ» хаһыат, edersaas.ru

Хаартыска http://sakhaprofs.org