Суолталаах

Миниистир баһаары утары охсуһуу көдьүүстээҕин бэлиэтээтэ

Атырдьах ыйын 24 күнүгэр Владимир Путин баһаары утары охсуһууга бырабыыталыстыба мунньаҕын ыытта. Биллэрин курдук, билигин Рязанскай, Нижегородскай уобаластарга уонна Марий Эл Өрөспүүбүлүкэтигэр улахан баһаардар турдулар. Мунньахха Айсен Николаев эмиэ кытынна.

РФ Айылҕа ресурсаларыгар уонна экологияҕа миниистирэ Александр Козлов Саха сиригэр баһаары утары үлэ көдьүүстээхтик ыытыллыбытын бэлиэтээтэ. Былырыыҥҥыны кытары тэҥнээтэххэ, ойуур баһаардарын иэнэ 13 төгүл кыччаабыт. Миниистир этэринэн, бу эрэгийиэннэргэ саамай бастыҥ көрдөрүү буолар.

Бүгүҥҥү күҥҥэ дойду үрдүнэн ойуур баһаара 3,2 мөлүйүөн га сири сиэтэ. Ити былырыыҥҥыны кытары тэҥнээтэххэ, 2,8 төгүл кыра (9,2 мөлүйүөн га этэ). Аҥаардас Саха сирэ баһаар иэнин 13 төгүл кыччатта, — диэн кини эттэ.

Бу туһунан премьер-миниистир Михаил Мишустин Саха сиригэр кэлэ сылдьан эмиэ этэн турар. Ойуур баһаардарын кытары охсуһуу көдьүүстээх буолбутун бэлиэтээбитэ.

Быйыл Саха сиригэр 572 975 га иэннээх сиргэ 527 ойуур баһаара күөдьүйбүтэ биллэр. Былырыын баччаларга 7 514 292 га иэннээх сиргэ 1502 ойуур баһаара күүдэпчилэнэ умайара.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram Whatsapp