Тыа хаһаайыстыбатын миниистирэ Александр Атласов Муомаҕа сылдьан, улуус дьаһалтатын уонна актыыбын кытары тыа сирин кэлим сайыннарыыга туһуламмыт кэпсэтиини таһаарда.
edersaas.ru
Тус хоту сытар, тыйыс айылҕалаах Муома улууһугар кыралыын-улаханныын 4 тыһ. 139 киһи олорор. Барыта 485 ынах сүөһү, ол иһигэр 165 ыанар ынах, 1 тыһ. 759 сылгы баар. Сыл саҕаланыаҕыттан 149 туонна үүт, 7 туонна эт соҕотуопкаламмыт. Сааскы халаантан тэптэрэн, кыстыыр от 68 %-а, 1 тыһ. 465,2 туонна от бэлэмнэммит. Ситэтэ суох чахчынан, биир сүөһүгэ 8,2 сэнтиниэр аһылык единицата тиксэр (өрөспүүбүлүкэҕэ бу көрдөрүү 10,2 сэнтиниэр), итинэн сылгы аһылыкка маассабайдык киирэр түбэлтэтигэр, сүөһү кыстыга уустук буолар чинчилэммит. Эти-үүтү дэлэтиигэ бас билии көрүҥүттэн тутулуга суох тыа хаһаайыстыбатын сэттэ тэрилтэтэ, ол иһигэр биэс кэпэрэтиип, сэттэ бааһынай хаһаайыстыба, алта көһө сылдьар аҕа ууһун общината итиэннэ отут икки чааһынай көмөлтө хаһаайыстыбата үлэлииллэр.
Кэпсэтии көхтөөхтүк барда
Нэһилиэктэр баһылыктара, дьокутааттара, хаһаайыстыбалар салайааччылара уонна тыа хаһаайыстыбатын исписэлиистэрэ миниистир Александр Атласовы кытары көрсүһүүгэ ынах сүөһүнү уонна табаны иитии туруктарын, кыһалҕаларын итиэннэ инники соруктарын туһунан кэпсээтилэр. Ханна да буоларын курдук, таба да, сүөһү-сылгы да көрүүтүгэр сүрүннээн саастаах дьон сылдьалларын бэлиэтээтилэр. 2013 сыллаах улахан халаан итиэннэ дохсун ардахтар тэбиилэриттэн ууга былдьаммыт ходуһалартан ууну түһэрии үлэтэ ыытылларын наадалааҕынан аахтылар. Өртөөһүн бобуллан, үгүс сир кур лаҥхаҕа кубулуйбутун, сүөһү боруодатын тупсарыыга племенной үлэни күүһүрдэр наадатын, оттук-уматык сыаналара ыарыы турара үлэҕэ-хамнаска олус охсорун эттилэр.
Дьаарбаҥка-быыстапкаҕа ыраах нэһилиэктэр эмиэ кэлбиттэр
—Нэһилиэнньэни этинэн-үүтүнэн хааччыйыыны кэҥэтэр туһугар улуус киинигэр, Хонуу бөһүөлэгэр, 50 сүөһүлээх пиэрмэни тэрийиэхпитин баҕарабыт, — диэтэ улуус баһылыга Иван Павлов. Даҕатан эттэххэ, Иван Петрович ааспыт өттүгэр сопхуос дириэктэринэн, тыа хаһаайыстыбатын солбуйааччы миниистиринэн итиэннэ Арктика дьыалаларыгар судаарыстыбаннай кэмитиэт солбуйаачы бэрэссэдээтэлинэн таһаарыылаахтык үлэлээбитэ, тыа хаһаайыстыбатын ымпычын-чымпыгын үчүгэйдик билэр. Онон улууска төрүт дьарыктары сайыннарыыга хамсааһыны таһаарыаҕар улуус олохтоохторо эрэнэллэр.
Улуус баһылыга Иван Павлов бастыҥ үлэһиттэри бэлиэтиир
Бу күн Тыа хаһаайыстыбатын үлэһиттэрин күнэ тэрилиннэ, үлэ көрдөрүүлэригэр түмүк таһаарылынна, кэлэр сылга соруктар туруорулуннулар. Бастыҥ үлэһиттэр бэлиэтэннилэр, олохтоох ас-үөл быыстапка-дьаарбаҥката тэрилиннэ.
Екатерина ЗАХАРОВА, «Саха сирэ» хаһыат, edersaas.ru сайтка анаан.