Тыа хаһаайыстыбатын миниистирэ Александр Атласов күннээҕи үлэни-хамнаһы билсиһэ Хаҥалас улууһугар сырытта.
edersaas.ru
II Дьөппөн нэһилиэгэр баар «Сайдыы» кэпэрэтиип сүөһүнү-сылгыны иитэрин таһынан, оҕуруот аһынан дьарыктанар. Кэпэрэтиип салайааччыта Сергей Латышев этэринэн, быйыл хортуоппуйу 3,5 гектарга, оҕуруот аһын 15,9 гектарга олордубуттар. От ыйын 1 күнүнээҕи туругунан, барыта 280 ынах сүөһүлээхтэр, ол иһигэр 107 ыанар ынахтаахтар. Кэпэрэтиип биригээдэтэ оттуу сылдьар, кыстыгы көрсө 400 туонна оту бэлэмниэхтээх эбит.
Министиэристибэ иһинэн үлэлиир «Тыа сирин территорияларын аныгы мөссүөнэ» судаарыстыбаннай федеральнай бырагыраама чэрчитинэн, бу нэһилиэккэ врачебнай офис тутуллар. Тутуу уопсай үбүлээһинэ 43,3 мөл. солк., ол иһиттэн федеральнай бүддьүөттэн 35,9 мөл., өрөспүүбүлүкэ бүддьүөтүттэн 3,1 мөл., бүддьүөтү таһынан источниктартан 4,3 мөл солк көрүллүбүт. Күн бүгүҥҥү туругунан, сыбаайата түһэриллэн, цокольнай сабыыта оҥоһулла сылдьар.
Раиса Сибирякова, «Саха сирэ» хаһыат, edersaas.ru