Бырабыыталыстыба ааспыт сыллаах үлэтин отчуотун Муома улууһугар тыа хаһаайыстыбатын миниистирэ Александр Атласов салайааччылаах биригээдэ туруорда.
edersaas.ru
Бэйэ-бэйэлэриттэн ыраах сытар нэһилиэктэри барыларын хабар, отчуот мунньаҕын оҥорор уонна нэһилиэнньэни кытары биирдиилээн көрсөн кыһалҕаны быһаарсар, кэпсэтэр-ипсэтэр сыалтан, биригээдэ икки бөлөххө хайдан үлэлээтэ.
Александр Атласов салайар бөлөҕө Хонуу сэлиэнньэтигэр уонна Улахан Чыыстай, Индигиир нэһилиэктэригэр үлэлээтэ.
Улууска бас билии көрүҥүттэн тутулуга суох 11 959 таба, 340 ынах сүөһү уонна 1 501 сылгы баар. Олору көрүүгэ-истиигэ, бородууксуйадарын астааһыҥҥа 16 кэлэктиибинэй уонна бааһынай хаһаайыстыбалара, биэс тыа хаһаайыстыбатын тэрилтэтэ, үс потребительскэй кэпэрэтиип үлэлииллэр.
Миниистири кытары көрсүһүүгэ олохтоохтор тыын суолталаах боппуруостар тула кэпсэттилэр, ол курдук ыччат киин сирдэргэ көһөрүн, дьиэ-уоту, социальнай эбийиэктэри тутуу, 2 % ипотека уо.д.а. тула санааларын эттилэр. Табаны иитии, хараалы оҥоруу боппуруостарын тумнубатылар. Улахан Чыыстай олохтоохторо сүөһү аһылыга тиийбэтин бэлиэтээн тураннар, 20 туонна оту хааччыйарга көрдөстүлэр.
Бу нэһилиэккэ Александр Атласов Худи Харючи аатынан аҕа ууһун общинатыгар сылдьан, үлэни-хамнаһы билистэ. Иван Громов салайар общината 1 300 табалаах, нэһилиэк эрэ буолбакка, улуус социальнай тэрилтэлэрин этинэн хааччыйан олорор. 2006 сыллаахтан «Сонгачаан» диэн сайыҥҥы лааҕыры тэрийэн, оҕолору төрүт үгэстэргэ үөрэтэр. 2009 сыллаахтан көс оскуола тэриллэн үлэлиир, онно Иван Валерьевич кэргэнэ Оксана Семеновна учууталлыыр.
Раиса Сибирякова, «Саха сирэ» хаһыат, edersaas.ru