«Миниистир» дьыалабыай оонньуу кыайыылаахтара Массачусетска үөрэниэхтэрэ
«Миниистир» ыччакка аналлаах өрөспүүбүлүкэтээҕи дьыалабыай оонньуу 2009 cыллаахха оччотооҕу Ил Дархан Егор Борисов этиитинэн төрүттэммитэ. Ол сылтан бу оонньууга тыһыынчаттан тахса киһи, ол иһигэр судаарыстыбаннай сулууспа үлэһиттэрэ, араас тэрилтэлэртэн исписэлиистэр, урбаанньыттар, муниципальнай тэриллии үлэһиттэрэ, фермердэр, устудьуоннар уонна үөрэнээччилэр кытыннылар. «Миниистир» оонньуу эдэр исписэлиистэри өйүүр, чаҕылхай ыччаты көрдөөн булар, өрөспүүбүлүкэ каадырын резервэтин оҥорууга биир саамай тутаах суол буолар.
Дьыалабыай оонньуу кыттыылаахтара өрөспүүбүлүкэ дьаһалтатыгар, министиэристибэлэргэ, улуус дьаһалтатын араас структуратын салайааччыларынан, солбуйааччыларынан, Арассыыйа атын субъектарыгар ананан үлэлии-хамныы сылдьаллар. Ол курдук, араас сылларга “Миниистиргэ” «Алмазы Анабара» АУо генеральнай дириэктэрэ Павел Маринычев, Канадаҕа Арассыыйа атыытын-эргиэнин бэрэстэбиитэлэ Валерий Максимов, СӨ бырабыыталыстыбатын бэрэссэдээтэлин солбуйааччы Денис Белозеров уо.д.а. кыттыбыттара.
Бэс ыйын 14 күнүгэр Ил Дархан Айсен Николаев “Миниистир” («Молодежь – инновационно-стратегический ресурс развития Республики Саха (Якутия)») дьыалабыай оонньууга уларыйыылар киирэллэрин туһунан ыйаахха илии баттаабыта. Манна ыйылларынан, 2019 сылтан Сомоҕолоһуу сылын чэрчитинэн дьыалабыай оонньуу саҥардыллыбыт форматынан ыытыллар диэн. Оонньуу сүрүн сыалынан үөрэнээччилэр, устудьуоннар, эдэр исписэлиистэр уонна салайааччылар лиидэрдии хаачыстыбаларын быһааран, Саха сирин социальнай, экэнэмиичэскэй сайдыытыгар сөпкө туһаналларын ыйыы-кэрдии буолар.
Оонньуу соруктара эмиэ уларыйдылар. Ол курдук, өрөспүүбүлүкэ салайар уонна ыччат каадырдарын резервэтин оҥоруу, дьыалабыай оонньуу финалистарын тус былааннарын сайдыытын бэлэмнээһин, лиидэрдэри, салайааччылары бэлэмниир бырагыраамалары оҥорсуу, өрөспүүбүлүкэ сайдыытын тосхоллуур биир санаалаах дьону түмэн, тэриллиилэри оҥоруу буолла.
Урукку сылларга бу оонньууга 16-35 саастаах 112 киһи кыттар эбит буоллаҕына, саҥа ыйааҕынан 16-45 саастаах РФ олохтоохторо кыттар буоллулар. Кыттааччылары үс бөлөххө араарыахтара: “А” бөлөххө – 16-22 саастаахтар, “В” бөлөххө – 22-35 саастаахтар, “С” бөлөххө – 45 сааһыгар диэри салайар уопуттаах дьон. Маны сэргэ эрдэ “Миниистиргэ” кыттыбыт дьон эмиэ кыттыахтарын сөп буолла.
Ил Дархан ыйааҕынан оонньуу түһүмэхтэрэ бигэргэтиннилэр: регистрация, сүүмэрдээһин, полуфинал, финал. Регистрация, сүүмэрдээһин, полуфинал түһүмэхтэрэ кэтэхтэн ыытыллыахтара, оттон финалга кыттааччылар бырайыак көмүскүөхтэрэ уонна стратегическэй сессияҕа кыттыахтара. Кыайыылаахтар «Артек», «Сириус» кииннэргэ, Москватааҕы судаарыстыбаннай университекка, Соҕуруу Кореяҕа баар SolBridge диэн норуоттар икки ардыларынааҕы урбаан оскуолатыгар, Массачусетстааҕы технологическэй институкка стажировкаланыахтара.
«Министр» дьыалабыай оонньууга сайаапкалары от ыйын 5 күнүгэр диэри https://vshim.ru/ministr-forma/ туталлар.
Айтана Аммосова, «Саха сирэ» хаһыат, edersaas.ru