Бэҕэһээ Дьокуускайга, “Кыайыы 50 сыла” Спорт дыбарыаһыгар түмүкэтэммит мини-футболга бастакы лига чөмпүйэнээтигэр алта бастыҥ иһигэр киирбит киин куорат, Алдан, Мэҥэ Хаҥалас, Мииринэй, Ленскэй уонна Өлүөхүмэ хамаандалара аны сайын Аммаҕа ыытыллар Саха сирин норуоттарын VII Спортивнай оонньууларыгар кыттар быраабы ыллылар. edersaas.ru
Манна Мэҥэ Хаҥалас футболистарын ойуччу тутан бэлиэтиир сөп. Дьокуускай, Алдан, Мииринэй, Ленскэй күүстээх хамаандаларын кытта күрэстэһиигэ үс кыайыыны сурунан, биирдэ тэҥнэһэн уонна иккитэ хотторон мэҥэлэр үһүс бочуоттаах миэстэни ыллылар.
Уон биэс очукуолаах дьокуускайдар кыайыылааҕынан буоллулар. Уон үс очукуоламмыт алданнар иккис миэстэҕэ таҕыстылар. Мэҥэлэртэн биир очукуонан хаалбыт мииринэйдэр быйыл төрдүс миэстэнэн дуоһуйарга күһэлиннилэр. Бу турнирга кинилэр соруктарынан Аммаҕа ыытыллар Оонньууларга путевканы ылыы буолла бадахтаах. Аны сайын «Алмаз-АЛРОСА» футболистарынан күүһүрдүллүбүт хамаанда кыайыы эрэ иһин киирсиэҕэ сэрэйиллэр.
Чөмпүйэнээт бастыҥ оонньооччуларынан Айсен Саввин (Мэҥэ Хаҥалас), Владимир Мазин (Мииринэй), Виктор Плоцкай (Алдан), Никита Кузнецов (Дьокуускай), Евгений Кобзев (Дьокуускай) ааттаннылар.
Турнир түмүгүнэн тиһэх миэстэҕэ хаалбыт жатайдар Иккис лигаҕа көһөр буоллулар. Куһаҕан үчүгэй суох буолбат дииллэринии, кинилэргэ сотору кэминэн буолуохтаах Иккис лига чөмпүйэнээтигэр 24 хамаанданы кытта хаалбыт тиһэх алта путевка иһин оонньуур өссө биир кыах бэрилиннэ.
Роман Попов, “Саха сирэ” хаһыат, edersaas.ru