Д.Г.Миндиашвили аатынан Тустуу академиятын бирииһигэр көҥүл тустууга Бүтүн Арассыыйатааҕы турнир тохсунньу 18-21 күннэригэр Красноярскайга буолара билиннэ.
Дойду сүүмэрдэммит хамаандатын сүрүн тириэньэрэ Дзамболат Тедеев эрдэ иһитиннэрбитин курдук, бу түһүлгэ финалыгар тахсыбыттар Иван Ярыгин кэриэһигэр норуоттар икки ардыларынааҕы күрэхтэһиигэ кыттар быраабы ылыахтара.
Оттон 57 уонна 74 киилэҕэ диэри ыйааһыннарга үстүү путевка оонньонуоҕа. Олору боруонса призердар бэйэлэрин икки ардыларыгар быһаарсыахтара.
Манна даҕатан эттэххэ, Ярыгин турнирыгар ыйааһын аайы Арассыыйаттан биэстии тустуук кыттыа диэн буолар.
Тустуу академиятын турнирыгар Саха сириттэн Семен Владимиров, Айсен Потапов (61 киилэ), Егор Потапов, Георгий Окороков (57 киилэ), Федор Постников, Быйаман Яковлев (57 киилэ), Айтал Захаров (61 киилэ), Стив Попов, Константин Власов (70 киилэ) тусталлара күүтүллэр.
Кинилэри сэргэ Сандра Карамзина (53 киилэ) уонна Ирина Афанасьева (59 киилэ) Красноярскай көбүөрүн тургутуутун ааһыахтара
Роман Попов, “Саха сирэ” хаһыат