«Мин уонна мин норуотум бырааһынньыга» уруһуй күрэһэ түмүктэннэ

Коронавирус дьаҥа туруоҕуттан, дьиэҕэ хааччахтанан олоруу эрэсиимэ киллэриллэн, тэрээһиннэр, араас күрэстэр куйаар ситиминэн ыытыллаллар. Олортон биирдэстэринэн, бу күннэргэ ыытыллыбыт «Мин уонна мин норуотум бырааһынньыга» диэн оҕолорго анаан ыытыллыбыт уруһуй куонкуруһа буолар.

Куйаар ситиминэн ыытыллыбыт күөн күрэһи А.Е.Кулаковскай аатынан норуоттар доҕордоһууларын дьиэтиттэн иһитиннэрдилэр. Хотугу аҕыйах ахсааннаах төрүт олохтоох норуоттар үгэстийбит култуураларынан дьарыктанар салаа тэрийэн, иилээн-саҕалаан ыыппыт. 

—Уруһуй куонкуруһа норуоттар икки ардыларынааҕы Оҕо көмүскэлин күнүгэр уонна Хотугу норуоттар үгэс буолбут национальнай бырааһынньыктарыгар ананна. Күөн күрэскэ аҕыс улуустан уонна Дьокуускай куораттан барыта 103 уруһуй киирдэ. Оҕолор Саха сиригэр ыытыллар национальнай бырааһынньыктарын, үгэстийбит олохторун-дьаһахтарын, национальнай таҥастарын-саптарын, астарын-үөллэрин, айылҕаларын кэрэтин бары кыһамньыларын ууран уруһуйдаабыттар, — диэн иһитиннэрэллэр.

 Ордук Аллайыахаттан, Усуйаанаттан, Эбээн Бытантайтан, Эдьигээнтэн, Кэбээйиттэн оҕолор көхтөөх кыттыыны ылбыттар.  Күөн күрэһи тэрийээччилэр улуустарга хотугу аҕыйах ахсааннаах төрүт олохтоох норуоттар ассоциацияларын көхтөөх кыттааччыларыгар, оскуолаҕа киириэн иннинээҕи саастаах оҕолору дьарыктыыр иитээччилэргэ, оскуола учууталларыгар уонна эбии үөрэхтээһин педагогтарыгар бу күрэс сэргэхтик барарыгар кыһамньыларын  иһин махтаналлар.  

Уруһуйдары сыаналааһыҥҥа дьүүллүүр сүбэ бэрэссэдээтэлинэн Екатерина Суржанинова, СӨ Хотугу аҕыйах ахсааннаах төрүт олохтоох норуоттар Ассоциациялара, худуоһунньук-живописец, иллюстратор, «Оҕо сааһым күнэ» (2018 с.) И.А.Николаев аатынан  тутулуга суох уопсастыбаннай бириэмийэ Гран-притын хаһаайына, «Ахсынньыга — саас» (2018 с.) кэлэктиибинэн быыстапка кыттыылааҕа, «Аата Либерти» (2018 с.), «Мэтириэт» (2019 с.), «Йэрпэйэ-Йэльоодьэ» (2019 с.), «Мин Арктикам» (2019 с.), «Өбүгэлэрим ыҥырыылара» (2019 с.), «Ален Мак» (2019 с.) персональнай быыстапкалар кыттыылаахтара үлэлээтэ; Кинини кытта дьүүллүүр сүбэҕэ Эдуард  Тойтонов,  А.Е. Кулаковскай аатынан норуоттар доҕордоһууларын дьиэтин худуоһунньуга; Айтал Коркин,  норуоттар доҕордоһууларын дьиэтин дизайнера; Ольга Охлопкова, Анастасия Куличкина бу тэрилтэ Хотугу аҕыйах ахсааннаах төрүт олохтоох норуоттар үгэстийбит култуураларын салаатын сүрүннүүр методистара киирбит үлэлэри көрдүлэр, сыаналаатылар.

Күөн күрэскэ киирбит уруһуйдар инстаграмҥа #Я_и_праздник_моего_народа хештеккэ көрүҥ.