Мындааба оскуолатыгар «Мин улууһум историята» диэн тэрээһин буолла

Уус Алдан улууһун Мындааба бөһүөлэгэр 1998 сылтан спортивнай хайысхалаах орто оскуола (дириэктэр Михаил Бурнашев) арыллан үлэтин саҕалаабыта. Оскуолабытыгар киэҥ нэлэмэн Сахабыт сирин  араас улуустарыттан оҕолор кэлэннэр спорт араас көрүҥнэригэр уһаарылла-хатарылла сылдьаллар. Оскуола 20 сыл үлэлээбитин тухары  Саха сирин аатын улахан  түһүлгэлэргэ дорҕоонноохтук ааттаппыт үгүс тустуук уолаттар  иитиллэн тахсыбыттара: Дмитрий Шадрин, Иннокентий Иннокентьев, Евгений Алексеев, бырааттыы Виктор уонна Александр Рассадиннар уо.д.а.

Оскуолабытыгар сылын аайы тус-туспа улуустартан араас иитиилээх, майгылаах-сигилилээх оҕолор кэлэллэр. Кинилэри бука барыларын биир сыалга түмэр, доҕордуу сыһыаны олохтуур, төрөөбүт, иитиллибит Ийэ дойдуларыгар тапталы иҥэрэр араас өрүттээх иитэр-үөрэтэр үлэ сыллата былааннаахтык ыытыллар. Быйылгы үөрэх дьылыгар оскуола интэринээтигэр 16 улуустан 75 оҕо уонна Красноярскай кыраай Дьэһиэй бөһүөлэгиттэн 2 оҕо кэлэн олорор, үөрэнэр.

Олунньу 27 күнүгэр интэринээт иитээччилэрин көҕүлээһининэн «Мин улууһум историята» диэн хаһыс да сылын ыытыллар үгэскэ кубулуйбут тэрээһин өрө көтөҕүллүүлээхтик буолан ааста.  Тэрээһин саҕаланыытыгар уолаттар төрөөбүт улуустарын гиэрбэтин күөрэччи көтөҕөн параадтаан  киирэн  дойду өрөгөйүн ырыатын ыллаан ньиргиттилэр.  Салгыы үөрэнэр оскуолаларын, интэринээттэрин туһунан  монтаж аахтылар. Ол кэннэ оҕолор улуустарынан тахсан төрөөбүт дойдуларын баай устуоруйатын, кэрэ-бэлиэ сирдэрин, чулуу дьонун туһунан киэн тутта кэпсээтилэр, бэлэмнээбит хаартыскаларын, видеороликтарын көрдөрдүлэр.

Маннык тэрээһин оҕоҕо төрөөбүт улууһун уратытын, кэрэтин билэ-көрө сатыырыгар, киэн тутта улаатарыгар, дьонун-сэргэтин үтүө аатын түһэн биэрбэт  туһугар дьаныардаахтык үөрэнэригэр, талбыт  спорт көрүҥүн баһылаан киэн билиилээх, чөл олохтоох, ситиһиилээх киһи киһитэ буола улаатан тахсарыгар суолтата улахан дии саныыбыт.

Нюрбина Васильева, Мындааба оскуолатын учуутала,

edersaas.ru саайтка анаан.