Бу күннэргэ Хаҥалас улууһугар баар “Орто Дойду” этнокомплекс сиригэр-уотугар “Хотугу Синергия” ыччат форума буола турар. Форум чэрчитинэн “Мин-Инженербин” Уһук Илиҥҥи куонкурус иккис түһүмэҕэ саҕаланна. Эдэр инженердэр Федерация Сэбиэтин чилиэнэ Вячеслав Штыров бирииһигэр илин-кэлин түсүһэллэр. edersasas.ru
— “Мин-Инженербин” хайысха форумҥа төрдүс төгүлүн үлэлээтэ. Быйыл лектор быһыытынан Москваттан Сколково киинтэн маркетины салайыы дириэктэрэ Олег Баранник кэлэн үлэлээтэ, мустубут ыччакка сүбэ-ама буолла. Форумҥа кыттыбыт инженердэр бырайыактара олоххо киирэн, өрөспүүбүлүкэбитигэр эрэ буолбакка, бүтүн Уһук Илиҥҥэ туһаны аҕалыахтара диэн эрэнэбин”, — диэн “Мин-Инженербин” уопсастыбаннай тэриллии бэрэссэдээтэлэ, Дьокуускай куорат Дууматын дьокутаата Владимир Аммосов санаатын үллэстэр.Куонкурус бырайыактарын ыччат миниистирэ Афанасий Владимиров, бырамыысыланнас миниистирэ Андрей Панов, Саха сирин инженердэрин Үрдүкү Сэбиэтин бэрэссэдээтэлэ Виталий Басыгысов уо.д.а. сыаналаатылар, көрдүлэр-иһиттилэр.
Экспертэри кытта Комсомольск-на-Амуре куорат “Сухой” собуотун дириэктэрин солбуйааччы Сергей Лиманов дьүүллэстэ:
— Хас биирдии кыттааччы бырайыага интэриэһинэй уонна инникилээх эбит диэн көрдүм. Светлэйдээҕи индустриальнай техникум устудьуонун Алексей Строев үлэтин өйдөөн хааллым. Кини фрезернэй станок таҥмыт. Маннык станоктар бааллар, ол эрээри олус ыарахан сыаналаахтар. Алексей устудьуоннар тутталларыгар, үөрэнэллэригэр диэн 45 тыһ. солк. суумаҕа хомуйан оҥоруохха сөп эбит диэн этиитин сэргээтим. “Хотугу Синергия” форум таһымын, ыччат толкуйдаабыт бырайыактарын биһирээтим. Комсомольскайга тиийэн куорат дьаһалтатыгар кэпсиэм, маннык форуму тэрийиэххэ сөп эбит диэн санааҕа кэллим.
“Мин-Инженербин” куонкурус үһүс түһүмэҕэ быйыл күһүн Дьокуускайга ыытыллыаҕа. Кыайыылаах инженер сыаналаах массыына хаһаайынынан буолуоҕа.
Айтана Аммосова, edersasas.ru