Таатта улууһугар Ытык Күөлгэ «Мин идэм- IT» куонкурус сүүмэрдиир түһүмэҕэ саҕаланна.
Манна уопсайа 28 хамаанда кыттыыны ылыаҕа. Бу куонкурус оскуола оҕолоругар уонна устудьуоннарга аналлаах. Номнуо VI төгүлүн өрөспүүбүлүкэҕэ ситиһиилээхтик ыытыллар. Бүгүн, кулун тутар 3 күнүгэр, бу тэрээһин үөрүүлээх аһыллыыта буолла. Манна онлайн эрэсиим нөҥүө цифровой сайдыы уонна инновация, коммуникативнай сайдыы миниистирэ Анатолий Семенов, үөрэх миниистирэ Михаил Сивцев, Якутия технопарк генеральнай дириэктэрин эбээһинэһин толорооччу Петр Габышев, inDriver Ykt.ru төрүттээбит Арсен Томскай уонна улуус баһылыга Михаил Соров кытыннылар.
Уопсайа 28 хамаанда, 84 кыттааччы «Точка роста» диэн Ытык Күөл 1 № -дээх оскуолатын киинигэр муһуннулар.
Өрөспүүбүлүкэ оскуолаларыгар бары сүмэрдиир түһүмэхтэр түмүктэринэн, бастыҥ хамаандаларга ыам ыйын саҥатыгар былааннанар финалга кыттарга путевка бэриллиэҕэ. Оттон «Мин идэм — IT» кыайыылаахтарыгар дойду үрдүк үөрэҕин кыһаларыгар тус сыаллаах миэстэлэр бэриллиэхтэрэ, финалистарга тэрээһин спонсордарыттан бириистэр туттарыллыахтара.
Ульяна Захарова.