Бу күннэргэ ыччакка аналлаах «Мин идэм — IT» өрөспүүбүлүкэтээҕи таһымнаах куонкурус саҕаланна.
Елена ПОТОЦКАЯ, «Саха сирэ» хаһыат, https://edersaas.ru
Аныгы үйэҕэ ыччат ортотугар IT-өҥөнү оҥоруу уонна IT-бородууксуйаны оҥорон таһаарыы боппуруоһа инники күөҥҥэ сылдьар. Инновация бырайыактара билигин IT-бырагыраама эрэ нөҥүө оҥоһуллаллар. Өйдөнүмтүө уонна судургу буолан, бу өҥөнү оҥорор дьон ытыс үрдүгэр сылдьаллара мэлдьэх буолбатах. IT-бородууксуйатын оҥорон таһаарыыга ордук ыччаттар ылсыбыттарын учуоттаан, «Якутия» технопаарка салайааччыта Анатолий Семенов «Мин идэм — IT» өрөспүүбүлүкэтээҕи таһымнаах куонкуруһу тэрийдэ. Бүгүҥҥү күҥҥэ өрөспүүбүлүкэ улуустарыттан оскуола оҕолоруттан, устудьуоннартан уонна эдэр исписэлиистэртэн куонкурска кыттарга 134 сайаапка киирдэ.
IT-бородууксуйатын оҥорон таһаарыыга кыттааччылар «Юниор», «А» уонна «Б» үс бөлөххө хайдыһан кыттыахтара. Интернет нөҥүө кэтэхтэн кыттааччылар эмиэ баар буолуохтара.
Куонкурус сүрүн бирииһэ дьоһун — информационнай технологиялары чинчийэр Санкт-Петербургдааҕы национальнай университет механика уонна оптика бырагыраамаларыгар бакалавриакка уонна магистратураҕа тус сыаллаах үөрэнии (Санкт-Петербургский университет ИТМО). Ол иһин киирсии кытаанах буолар чинчилээх. Бу бириискэ «А» бөлөх уонна «Б» бөлөх «Программирование» уонна «Менеджмент» категорияларыгар кыттыбыт ыччаттар тиксиэхтэрэ. «Юниор» бөлөх 10 бастыҥ кыттааччыта (8-10 кылаас үөрэнээччилэрэ) сайыҥҥы кэмҥэ Саха сирин Аччыгый академиятыгар «Кванториум» диэн инновационнай бырайыактары бэлэмниир сайыҥҥы оскуолаҕа үөрэниэхтэрэ. «А» категорияҕа оскуола уонна орто анал үөрэх кыһатын выпускниктара, «Б» категорияҕа устудьуоннар уонна 30-гар диэри саастаах ыччаттар кыттыахтара. Бу бөлөх кыттааччыта үс хайысхаттан — бырагырааманы оҥоруу, дизайн, менеджмент — биирин талар. Оттон кэтэхтэн кыттааччыларга анаан муус устар 22-23 күннэригэр «Хакатон-2017» диэн интернет-бырайыактары көмүскээһин ыытыллыаҕа.
«Мин идэм — IT» өрөспүүбүлүкэтээҕи таһымнаах куонкурус түмүгэ муус устар 29 күнүгэр биллиэҕэ. Кыайыылаахтары куонкурус бастыҥын аата иҥэриллиитин туоһулуур диплом уонна сыаналаах бириис «көмүс ардаҕа» күүтэр.
Елена ПОТОЦКАЯ, «Саха сирэ» хаһыат, https://edersaas.ru