Мэлдьэхси нэһилиэгэр кырдьаҕастар дэкээдэлэрэ бэрт тэрээһиннээхтик, истиҥник ыытылынна.
Академик Афанасий Чугунов аатынан агро-оскуола үөрэнээччилэрэ, оскуола эдэр учууталларын “Түмэн” түмсүүтэ тимуровскай үлэлэри ыыттылар. Оттон үөрэх кыһатын дириэктэрэ Лариса Сыромятникова кырдьаҕастарга дьиэлэринэн сылдьан, кууллаах хортуоппуй түҥэттэ, үөрэнээччилэр ытык-мааны дьоннорун олоҥхонон эҕэрдэлээтилэр.
Кырдьаҕастарга анаан аптека эмп аҕалан атыылаата, чэпчэтиилээх сыананан баттах кырыйыыта тэрилиннэ.
Аҕам саастаах дьоммутугар аналлаах дэкээдэ түмүгэр Култуура, сынньалаҥ киинигэр дьоһун тэрээһин ыытылынна.
Манна, Мэлдьэхси нэһилиэгин аҕа баһылыга Валерий Никифоров ытык дьоҥҥо, бэтэрээннэргэ истиҥ эҕэрдэтин тиэрдэн туран, үөрүүлээх быһыыга “И.В. Сталин төрөөбүтэ 140 сыла” мэтээллэри туттарда.
Нэһилиэк кырдьаҕастарын түмсүүтүн бэрэссэдээтэлэ Аграфена Васильева мустубут дьоҥҥо эҕэрдэ тылын эттэ уонна бу дэкээдэ чэрчитинэн туох үлэ барбытын иһитиннэрдэ. Социальнай үлэһит Людмила Шарина көҕүлээһининэн, кырдьаҕастарга “Үтүө санаа долбуура” үлэлээтэ. Бу акцияҕа кыттыбыт дьоҥҥо махтал! Кырдьаҕастарга анаан дьиэ хаһаайкалара кэнсиэрбэлэммит оҕуруот аһын, барыанньа арааһын аҕалан уурдулар.
Булчут дьоммут Иван Плотников, Вячеслав Окороков, Григорий Свинобоев, Павел Степанов, Аян Тарабукин, Егор Охлопков, Федор Протопопов, Василий Тихонов бултаабыт кустарын, куобахтарын аҕалан, буһаран, остуолга кырдьаҕастары күндүлээтилэр, ону тэҥэ кинилэри дьиэлэригэр байанай бэрсибит булдуттан илии тутуурдаан, кэһиилээн ыыттылар. Оттон олохтоох урбаанньыттарбыт — Розалия Михайлова кырдьаҕастарга анаан 3 этээстээх торт бэлэхтээтэ, Зоя Куприянова оҕуруот аһынан, фруктанан, Изабелла Степанова бэйэтэ бэлэмнээбит минньигэс бурдук астарынан бырааһынньыктааҕы остуолу ситэрэн-хоторон биэрдилэр.
Дьоро киэһэни Мотрена Сыромятникова салайан ыытта. Бу күн элбэх ырыа ылланна, үҥкүү үҥкүүлэннэ. Ол курдук, оскуола үөрэнээччилэрэ “Эҕэрдэ” үҥкүүлэринэн, уолан уолаттар «Саха таптыыр» диэн ылбаҕай ырыаларынан, трио «Маҥнайгы хаар», Семен Герасимов «Ветеран аҕабар» ырыаларынан эҕэрдэлээтилэр. Баяҥҥа Лука Попов доҕуһуоллаата. «Далбар» үҥкүү бөлөҕө «Синий платочек» саҥа үҥкүүтэ биһирэннэ.
Дьоро киэһэҕэ бэртээхэй быыстапка тардылынна, манна коллекционер Надежда Андросова Дьөһөгөй оҕото, сылгы сувенирдара, халандаардара, бибилэтиэкэ көҕүлээһининэн «Хатыҥчаан» уһуйаан оҕолорун уонна алын кылаас үөрэнээччилэрин «Мин эбээм, мин эһээм” уруһуйдара, саҥа тахсыбыт кинигэлэр дьон болҕомтотун тартылар. Оскуола түмэлигэр, үтүө бачыымы өйөөн, Мария Плотникова ааспыт кэм чаһытын, чэй хаҕын, саха курун бэлэх уунна.
Суоппар Родион Шарин, дуоһуйа, астына сынньаммыт кырдьаҕастары олохтоох салалта массыынатынан дьиэлэригэр тиэрдэн биэрэн, ытык-мааны дьоммут үөрүүлэрэ өссө үрдээтэ.
Бу тэрээһиҥҥэ кыттыбыт бар дьоммутугар махталбытын тиэрдэбит. Үтүө үгэс салҕана турдун!
Надежда АНДРОСОВА,
Мэҥэ-Хаҥалас улууһа, Мэлдьэхси.