Өрөспүүбүлүкэ маҥнайгы бэрисидьиэнэ Михаил Николаев уурааҕынан Сахабыт сиригэр Аҕалар күннэрэ муус устар бастакы өрөбүлүгэр сыл аайы бэлиэтэнэр. Эр киһи ыал буолан, аал уоту оттунан «Аҕа баһылык» дэтэрин тухары ыал аҕатын үрдүк аатын сүгэр. Дьиэ кэргэн нус – хас олоҕо уонна олоҕун бары уйгута, оҕолору иитии ийэттэн эрэ буолбакка, аҕаттан эмиэ улахан тутулуктаах. Аҕа тус холобура, кини ийэҕэ ытыктабыллаах сыһыана, төрөппүт эппиэтинэһин толоруута, оҕону олох киэҥ аартыгар таһаарарга улахан көмөлөөх.
Билиҥҥи уустук олохпутугар аҕа киһи ыллыктаах сүбэтинэн-аматынан, өйүнэн-санаатынан дурда – хахха, кэлэр кэнчээри ыччаты иитиигэ сүрүн күүс буолар. Аҕа киһи үтүө холобурунан уолаттарын иитиитэ, күүс-көмө буолуута, уол оҕоҕо эр киһи хаачыстыбаларын иҥэриигэ ордук суолталааҕа саарбаҕа суох.
Дьокуускай куорат 10 №-дээх «Туллукчаан» уһуйаан кэлэктиибэ кэлэн иһэр аҕалар күннэрин көрсө араас дьаһаллары бэлэмниир. Ол курдук, «Мичээр» бэлэмнэнии бөлөҕүн оҕолоро аҕа күнүгэр эрдэттэн бэлэмнэнэллэр.
Мин бу бөлөххө аҕаларын кытта биир дьарыктаах оҕолор баалларын бэлиэтии көрөбүн. Түгэнинэн туһанан, кинлэри кытта кэпсэттим, оҕолор бэйэлэрин санааларын бу курдук эттилэр:
Тимур Бурнашев:
— Мин сөбүлүүр дьарыгым дуобат. Миигин кытта дьиэбэр аҕам Дмитрий Иванович иллэҥ кэмигэр дуобаттыыр. Кини успуорка талааннаах, оҕо эрдэҕиттэн араас көрүҥүнэн дьарыктанар. Быйыл иккиэн дуобаттаан уһуйааммыт чиэһин уокурукка уонна куоракка көмүскээтибит. Аан бастаан иккиэн кытынныбыт уонна ситиһиилэннибит, онтон олус үөрэбит. Аҕам миигин нэдиэлэҕэ үстэ дуобат киинигэр дьарыкка таһар. Мин бу дьарыкпын бырахпакка салгыам, элбэх ситиһиилээх киһи буолуом.
Саша Сивцев:
— Мин аҕам курдук футболунан дьарыктанабын. Аҕам Вадим Васильевич оскуола саҕаттан куорат уонна өрөспүүбүлүкэ үрдүнэн ыытыллар күрэхтэһиилэргэ ситиһиилээхтик кыттар. Мин эмиэ футболу сэҥээрбиппэр аҕам «Заря» диэн ааттаах мини-футбольнай кулуупка илдьибитэ. Манна мин 2019 сыл олунньуттан нэдиэлэҕэ үстэ дьарыктанабын. Ситиһиилээхтик дьарыктанан, улахан куораттарга футболга күрэхтэһэ барыахпын баҕарабын. Улаатан баран аҕам уонна Криштиану Роналду курдук күүстээх футболист буолуом!
Александрия Колодезникова:
— Мин кыра эрдэхпиттэн аҕам Михаил Прокопьевич уһанарын, араас сувенир эскиһын уруһуйдуурун, мас оноһуктары оҥорорун көрөөччүбүн. Аттыгар олорон араас мультик геройдарын уруһуйдуурбун, пластилинынан үтүктэн оҥорорбун сөбүлүүбүн.
Мин аҕам дизайнер үөрэхтээх, иккис идэтэ тутуу инженерэ. Билигин аҕам бэйэтин мастарыскыайыгар уһанар, дьоҥҥо маһынан дьиэ малын, хатыламмат оноһуктары, сувенирдары оҥорор. Куоракка ыраах дойдуттан кэлбит дьон аҕам оноһуктарын сөбүлээн, дьонноругар өйдөбүнньүк бэлэх ылан бараллар.
Мин уруһуйум табыллыбатаҕына, аҕам миэхэ көрдөрөн биэрэр. Пластилин оҥоһуктарбын дьиэбэр мунньа сылдьабыт. Улааттахпына аҕабар көмөлөһүөм, уруһуйдуур дьарыкпын быраҕыам суоҕа.
Аҕалар оҕолорун бэйэлэрин таптыыр дьарыктарыгар уһуйуулара барыбытын үөрдэр, ситиһиигэ сирдиир. Оҕолорбут барахсаттар аҕаларын үтүө холобур оҥостон, күннэтэ үүнэллэр-сайдаллар, ыра санааларын толорорго дьулуһаллар.
Түмүккэ, кэлэн иһэр аҕалар күннэринэн «Туллукчаан» уһуйаан аатыттан бары уолаттарбытыгар, аҕаларбытыгар уонна эһэлэрбитигэр истиҥ эҕэрдэбин тиэрдэн туран, чэгиэн доруобуйаны, үлэлэригэр ситиһиилэри, дьиэ кэргэттэригэр дьолу-соргуну баҕарабын!
РФ суруналыыстарын сойууһун чилиэнэ, РФ уопсай үөрэхтээһинин бочуоттаах үлэһитэ Парасковья Попова -Тускулаана.