Мин Хотугулуу-Илиҥҥи федеральнай университет суруналыыстыкаҕа салаатын үһүс кууруһун устудьуона буолабын. Аҕыйах хонуктааҕыта edersaas.ru саайтка сахалыы-нууччалыы электроннай тылдьыт баар буолбутун истэммин, үөрэхпэр, чуолаан ыстатыйа, сонун суруйарбар туһанан көрдүм.
Биһиги үөрэхпитигэр үксүгэр тылга сибээстээх дьарыктары үөрэтэбит. Нуучча, саха тыла, философия, политика, история уонна да атын араас предметтэри үөрэтэбит. Сонун суруйаары гыннахха, сороҕор тылы тылбаастыырга ыарахаттары көрсөөччүм. Урут дьон билбэт тылын кинигэттэн, биитэр ыйыталаһан билэр буоллаҕына, билигин аныгы бириэмэ тэтиминэн төлөпүөн нөҥүө сып-сап тылбааһы була охсобут. Мин төлөпүөммэр «Саха тыла» диэн тылбаасчыты туһанабын. Ол эрэн ити сыһыарыыга сорох тыл быһаарыыта кылгаһын таһынан, үгүс тыл суох. Оттон бу соторутааҕыта edersaas.ru саайтка тылдьыты оҥорбуттарын истэн, эмиэ тыллары тылбаастатан көрдүм. Манна тыл тылбааһа эрэ буолбакка, кини хайдах эбии туттуллуон сөбө эмиэ баар эбит. Бу олус үчүгэй. Дьоҥҥо олус наадалаах. Инникитин өссө интэриниэтэ суох туттарга сыһыарыы баара эбитэ буоллар, диэн баҕа санаалаахпын.
Милона Иванова, ХИФУ суруналыыстыкаҕа салаатын устудьуона