Милена Борисова ырыаларынан «Көмүс түгэн» өрөспүүбүлүкэтээҕи куонкурус ситиһиилээхтик түмүктэннэ

Ырыа айааччы, ырыаһыт Милена Борисова ырыаларын бастыҥ толорууга «Көмүс түгэн» диэн өрөспүүбүлүкэтээҕи куонкурус быйыл үһүс төгүлүн үрдүк таһымнаахтык буолан ааста. Былырыыҥҥыттан дьаҥ мэһэйдээн куонкурус тэйиччиттэн ыытыллар. Быйыл Сахабыт сирин араас улуустарыттан 478 оҕо кыттан, 128 ырыаны толордулар.

Ырыа кэрэ эйгэтигэр оҕо-аймаҕы кыра сааһыттан сыһыарар баҕаттан бу куонкуруһу ырыаһыт, элбэх ырыа ааптара, оҕо ырыатынан идэтийэн дьарыктанар Милена Борисова үһүс сылын тэрийэн ыытта. Оҕолор балаһыанньа быһыытынан, ырыа толороллорун видеоҕа устан тэрийээччилэргэ ыытан, дьүүллүүр сүбэ уонна норуот куоластааһына бастыҥнары талла. Быйыл куонкурус таһымнанан, СӨ Ыччат дьыалаларыгар уонна социальнай коммуникацияларга министиэристибэтин (миниистир Петр Шамаев) иһинэн тэрилиннэ.

Ыраахтан-чугастан киирбит толорулаары  биллэр ырыаһыттар Ирена Файрушина, Николай Роббек, Розалина Файрушина, Сахамин уонна Анна Дива — Алена Яковлева икки күн устата дьүүллээн иһиттилэр. Ол түмүгэр муҥутуур кыайыылааҕынан Амма улууһун Сатаҕай нэһилиэгиттэн сылдьар 11-с кылаас үөрэнээччитэ Нарыйаана Судинова буолла. Кини «Таптыыр Аммам» ырыаны толорон тэрийээччилэр куттарын тутуон тутта.

Оттон норуот куоластааһына «Инстаграм» социальнай ситимҥэ барда. Манна кыайыылаахтарынан Ньурба улууһун Антоновкатыттан сылдьар игирэ кыргыттар —  Күннэй уонна Сайаана Егоровалар буоллулар.

Кыайыылаах Нарыйаана Судинова Амма улууһун култуураҕа управлениета (начаалынньык Иван Ивнаов-Ванс) туруорбут аныгы тэлэбиисэринэн наҕараадаланна. Оттон норуот куоластааһынын кыайыылаахтара Күннэй уонна Сайаана Егоровалар Любовь Лопатина-Зыкова устуудьуйатыгар босхо аранжировка оҥотторого сэртипикээти  туттулар. Итиэннэ кыттааччыларга «Көмүлүөк» хампаанньаттан, норуот дьокутаата Руслан Федотовтан, «Мичээр» ырыа устуудьуйатын төрөппүттэрэ туруорбут сыаналаах бириистэрин, «Микс букет» сибэкки солуонуттан сэртипикээттэри туттардылар.

Сүрүн тэрийээччи быһыытынан Милена Борисова куонкурус туһунан маннык кэпсиир:

— Саха сирин ырыа айааччыларын сойуустарыгар киирбитим. Онон оҕолорго бу куонкурус наадалаах буолуо диэммин, ырыа эйгэтигэр сысталларыгар, баҕар, сорохтор бастакы хардыылары оҥороллоругар көмө буолуо диэммин тэрийэбин. Үс сыллааҕыта Дьокуускайга Оҕо дыбарыаһыгар үрдүк таһымнаахтык бастакы куонкурус  ыытыллыбыта. Онтон кынаттанан, үгүс оҕо кыттыан баҕарарыттан сыллата ыытабын. Дьиҥэ, саас ыытыахтаах этим, кырачаан оҕолоох буоламмын табыллыбатаҕа. Ону быйыл хайаан даҕаны куонкуруспун ыыттахпына табыллар диэн санааттан, Саҥа дьыл иннинэ оҥордум.

Быйылгы куонкуруспутугар тэрийээччилэр эрдэттэн биир муҥутуур кыайыылаах, бөлөх аайы үстүү лауреат, дипломант баар буолуохтаах диэн биллэрбиппит. Онон 128 нүөмэртэн отучча бастыҥы таллыбыт. Дьаҥ туран, тэйиччиттэн ыытыллар куонкурус олус элбээн да буолуо, кыттыбыт оҕо барыта кыайыылаах буолар, бэлиэтэниэхтээх диэн сыыһа өйдөбүл олохсуйаары гыммыт эбит. Куонкурус буолан баран ким эрэ кыайыы өрөгөйүн, ким эрэ хотторуу хомолтотун  билэр буоллаҕа диэн педагог уонна тэрийээччи быһыытынан этиэхпин баҕарабын.

Өрөспүүбүлүкэбит араас муннуктарыттан — хоту, Бүлүү бөлөх, киин, илин эҥээр улуустара бары көхтөөхтүк кыттан, үлэ бөҕөтө киирбититтэн олус астынныбыт. «Көмүс түгэн» куонкурус кыттааччыларыгар, салайааччыларыгар, төрөппүттэргэ, спонсордарга, бииргэ үлэлэспит партнердарбар улахан махталбын тиэрдэбин.

Айтана Аммосова, edersaas.ru

Сүрүн хаартыскаҕа: муҥутуур кыайыылаах Нарыйаана Судинова,

тэрийээччи Милена Борисова «Саҥа күн» биэриигэ.