Бу күннэргэ улуус аайы үгэс быһыытынан Саҥа дьыллааҕы хаар уонна муус оҥоһуктары оҥорон эрэллэр.
Ол оҥоһуктар социальнай ситимнэри толорон, аптаах бырааһынньык чугаһаабытын биллэрэллэр.
Бүгүн сарсыарда үгүспүт батсаап бөлөхтөрүгэр кэлбит кэлэр сыл бэлиэтэ Баабыр оҥоһуулаах хаартыскалары көрөн, санаабыт көнньүөрэн уһугуннубут.
«Үөһээ Бүлүү улууһун уран тарбахтааҕа Миитэрэй Баппаҕай сыл аайы хаарынан араас дьэрэкээн оҥоһуктары оҥорон, бар дьонун үөрдэр. Үүнэр сыл хаһаайына баабыры быйыл эмиэ олус табан оҥорбут», — диэн иһитиннэрэр улуус дьаһалтатын инстаграма.
Батсаапка эбэн суруйалларынан, Миитэрэй Баппаҕай куукула оҥорор маастар Хаарчаана аҕата эбит. Онон айар талаан көлүөнэттэн көлүөнэҕэ хаанынан бэриллэр буоллаҕа.
Елена ПОТОЦКАЯ, «Саха сирэ» хаһыат.
Хаартыска (скриншот) — Үөһээ Бүлүү дьаһалтатын инстаграмыттан.