«Дьокуускай куоракка «Миитээ бурдуга” атыыга тахсыбыт. Сэлиэһинэй бурдугу бэйэбитигэр атыылыыр буолбуттар” диэн сурах социальнай ситимнэри тилийэ көттө. “Миитээ бурдуга” диэн ааттаах сибиэһэй бурдугу Мэҥэ Хаҥалас Хара нэһилиэгиттэн төрүттээх Назаровтар дьиэ кэргэн үүннэрэн, бэйэлэрэ ыраастаан, сууйан, хаалаан атыыга таһаарбыттар.
Бу туһунан бурдугу атыыга таһаарбыт, Дмитрий Михайлович Назаров кыыһын Татьяна Дмитриевнаны кытта кэпсэттим.
— Биһиги оҕо эрдэхпититтэн төрүт аспытын аһаан улааппыт дьоммут. Билигин номнуо ыал буолан икки оҕо ийэтэбин. Уолаттарым иккиэн успуордунан дьарыктаналлар, оскуола оҕолоро. Аҕам оҕолорун, сиэннэрин сибиэһэй төрүт аһынан аһатар сыалтан ынах, сылгы иитэр. Ону сэргэ бурдук үүннэрэр буолбута. Аҕам үүннэрбит бурдугун барытын бастаан бэйэтэ илиитинэн ыраастаан, сууйан о5олоругар, сиэннэригэр сиэтэр этэ. Бэйэ бурдугуттан олус минньигэс саха лэппиэскэтэ, онтон да атын бурдук ас астанар. Бастаан сэртипикээтин аһардан икки ый устата кэриҥэ кэтэһэн дьэ, боруобаҕа атыылаан көрөргө быһаарыммыппыт. Ити санааттан сиэттэрэн бэйэм сууйан, ыраастаан саҕалаабытым уонна судургутук атыылаан көрөргө быһаарыммытым. Аҕам судаарыстыбаттан бурдук үүннэриитигэр туох да көмөнү ылбатаҕа. Барытын бэйэтин хара күүһүнэн, сыратынан үүннэрэн, эргэ комбайннары өрөмүөннээн, онон туорахтаах бурдугун хомуйар. Оттон ити бурдугум хаатын дьон олус сэргээтэ. Итини бэйэм принтергэ таһааттаран оҥотторбутум. Тоҕо диэтэххэ, кумааҕы хааны сакаастыыр буоллахха, 10 тыһыынча хааттан саҕалаан сакааһы ылаллар. Ол харчытыгар таһаардахха, олус элбэх суума буолар. Биһиги бурдукпутун атыылыыр санаабыт суоҕа, бэйэбит сиирбитигэр эрэ диэн дьарык оҥостубуппут. 203 микрооройуоҥҥа баар «Зерно” диэн чөл олох аһылыгын маҕаһыыныгар дьээбэҕэ атыыга таһаарбытым, дьон көрөн тарҕата охсон, аҕыйах хааны атыылаһан бүтэрэ оҕустулар. Онон атыыга биир да хаа бурдуга суох олоробун. Аҕабар дойдубар ыраастамматах бурдук баар даҕаны, оннук элбэх буолбатах. Онон социальнай ситимҥэ түргэнник тарҕанан дьон бөҕө сураспытыттан бэйэм да соһуйдум. Бу бурдукпут барыта илии үлэтинэн оҥоһуллан тахсар. Бурдук оҥорон атыылыыр көҥүллээхпин, дьиэбэр кыракый миэлиҥсэлээхпин. Кистэлэ суох эттэххэ, ыйга уоннуу хаа бурдугу атыылаатым. Биир хааҕа балтараа киилэ бурдугу кутар этим. Судаарыстыбаттан туох эмэ көмө баара буоллар, киһи син дьарык оҥостон ылсыан сөп дии саныыбын.
“Саха сирэ” хаһыат кэлэр нүөмэригэр бурдук үүннэриитин сыралаах үлэтин саҕалааһынын туһунан «Миитээ бурдуга” ааты сүгэр Дмитрий Михайлович Назаровтыын кэпсэтиини сиһилии ааҕаарыҥ.
Ульяна ЗАХАРОВА.
Назаровтар дьиэ кэргэн тус архыыптарын хаартыскалара туһанылыннылар.