2017 сылтан “Куорат тупсаҕай эйгэтин тэрийии” бырайыак ситиһиилээхтик үлэлээн Саха Өрөспүүбүлүкэтигэр хас да куорат чэлгийэ түстэ. Оттон 2018 сыл Миирнэйгэ Гражданскай көҕүлээһин сылынан биллэриллибитэ. “Куорат тупсаҕай эйгэтин тэрийии” бырайыак чэрчитинэн, Миирнэй олохтоохторо куорат ханнык эбийиэгин өрөмүөннэтэллэрин бэйэлэрэ талаллар. Быйыл алмаастаах Мирнэйгэ ханнык эбийиэк тупсарылларын кулун тутар ыйга быһаарыахтара.
Былырыын Миирнэйгэ 13 дьиэ таһа уонна дьон 1 сылдьар сирэ чөлүгэр түһэриллибит буоллаҕына, быйылгыттан 2022 сылга диэри биирдии эбийиэги толору өрөмүөннээн чөлүгэр түһэриэхтэрэ. Ханнык эбийиэктэр бырагырааммаҕа хапсалларын олохтоох нэһилиэнньэ олунньу 9 чыыһылатыгар диэри санаатын этэн быһаарыаҕа. Маны таһынан, кулун тутар 18 күнүгэр быйыл өрөмүөннэнэр эбийиэги норуот куоластаан талыаҕа. Миирнэй салалтата 2022 сылга диэри сылга биирдии эбийиэгинэн араарда. Ол курдук, алмаас үөскүүр “Мир” трубканы арыйбыт дьоҥҥо аналлаах пааматынньык, Куорат паарката, Сэбиэскэй уулуссаҕа турар бульвар, Бобков аатынан уулуссаҕа сквер уонна Иирэлээх үрэххэ сынньанар сир киирдилэр. Олохтоох нэһилиэнньэ сөбүлэстэҕинэ ити эбийиэктэр “Куорат тупсаҕай эйгэтин тэрийии” бырайыак чэрчитинэн олоххо өрөмүөннэниэхтэрэ. Оттон утардаҕына, нэһилиэнньэ талбыт эбийиэктэрэ оҥоһуллуохтара.
Бырайыак туһунан сиһилии Миирнэй мэра Клим Антонов билиһиннэрдэ:
“Бырайыак чэрчитинэн туох тупсарыллыахтааҕын уопсастыбаннай ырытыыга таһаарбыппыт. Олунньу 9 күнүгэр диэри дьаһалта сайтыгар (gorodmirny.ru) куоластыыллар, бэйэлэрин барыйааннарын эмиэ этэллэр. Онтон Арассыыйа бэрэсидьиэнин талар күн – кулун тутар 18 күнүгэр быйыл ханнык объегы оҥорорбутун быһаарыахпыт. 2022 сылга диэри биэс объект тупсарыллыахтаах. Холобур, билигин маннык барыйаан баар: куорат пааркатыгар “Мир” трубканы арыйааччыларга пааматынньык аттынааҕы болуоссат, куорат пааркатыгар кэнсиэртиир сирдээх былаһаакка, Сэбиэскэй уулуссаҕа мастары олордон Москва Арбатын курдук бульвар, Заречнай мирко-оройуоҥҥа сквер, Ириэлээх үрэххэ сынньалаҥ сир. Мантан быйыл биир объект тутуллуоҕа. Дьонтон этиилэрин хомуйарга биһиэхэ волонтердар көмөлөһөллөр. Манна даҕатан эттэххэ, быйыл Мирнэйгэ Гражданскай көҕүлээһин сылын биллэрбиппит, онон бу бырайыак оруобуна барсар”.
Николай Попов, «Саха сирэ» хаһыат, edersaas.ru