Сүрүн Уопсастыба

Мииринэйтэн Дьокуускайга көтөн испит санитарнай рейскэ дьахтар оҕолонно

Алтынньы 13 күнүгэр Мииринэйтэн Дьокуускайга көтөн испит «Полярные авиалинии» хампаанньа Л-140 сөмөлүөтүн санитарнай рейсигэр кыыс оҕо төрөөтө. Бу туһунан хампаанньа пресс-сулууспата иһитиннэрэр.

Бу кэмҥэ сөмөлүөтүнэн оҕолоноору сылдьар үс дьахтар айаннаан испит. Акушер-гинеколог Евгения Целых, неонатолог быраас Денис Баишев уонна медсиэстэрэ Ньургуйаана Чучайцева тустаах көмөнү оҥорон, рейс кэмигэр талыыта киирбит дьахтар этэҥҥэ оҕолонно.

Сөмөлүөт Дьокуускайга 21 чааһы 20 мүнүүтэ ааһыыта түспүт. Экипаж чилиэттэрэ — хамандыыр Валерий Матвейчук, иккис пилот Дархан Старков, авиатехник Андрей Алексеев.

— Дьахтар оҕолоноору гыммытын туһунан Мииринэйтэн көппүппүт 40 мүнүүтэ буолбутун кэнниттэн иһитиннэрбиттэрэ. Дабылыанньа хамсаабатын туһутттан биир үрдүгү тута сатаабыппыт. Солуон иһигэр уоту холбообуппут, температураны үрдэппиппит. Быраастар сигнал биэриэхтэригэр диэри Дьокуускай үрдүнэн чаас курдук көттүбүт, — диэн хамандыыр Валерий Матвейчук этэр.

Сөмөлүөт түһэр балаһатыгар оҕону уонна ийэни анал тырааныспар көрсөн, тута Перинатальнай кииҥҥэ илдьибиттэр. Бу маннык түгэн хасыһын да буолар, ол эрээри быраастарга куруук долгутуулаах уонна эппиэтинэстээх. «Мин «Полярные авиалинии» сөмөлүөтүгэр дьахтары иккиспин төрөттүм. Ийэ уонна оҕо доруобуйаларын туруктара этэҥҥэ. Кыысчаан болдьоҕун иннинэ күн сирин көрдө, кислородунан тыынар», — диэн Мэдиссиинэ национальнай киини дистанционно-консультативнай киинин сэбиэдиссэйэ Евгения Целых кэпсиир.

Хаартыска: СИА.

1
1