МИИРИНЭЙГЭ ЯБЛОНЯ СААДА БААР БУОЛУОҔА

Бөлөххө киир:

Бэс ыйын 4 күнүгэр экологияҕа аналлаах аахсыйа кэмигэр 50 отон астаах маһы олортулар.

Сибиир дьаабылыкатын олордууга ыытыллыбыт аахсыйа «Яблонялаах саад» диэн ааттанар. Бу дьаһалы АЛРОСА Экологияҕа киинэ тэрийдэ. Кинилэр көҕүлээһиннэринэн сыл аайы куорат киинигэр эрэ буолбакка, куорат пааркатыгар мастары уонна сэппэрээктэри олордоллор. Сири-уоту тупсарыыны хампаанньа структурнай подразделениеларын, эбии үөрэхтээһин киинин үлэһиттэрэ өйөөтүлэр.

Экология киинин сала­йааччытын солбуйааччытын э.т. Алена Дьяконовалыын кэпсэттибит.

— Аахсыйа туох сыал­лаах-соруктаах ыытылларый?

— Дьаһал сүрүн сыала-соруга – Мииринэй куоракка тупсарыллыбыт сири оҥоруу. АЛРОСА хампаанньа айылҕа харыстабылын дьаһалларыгар улахан болҕомтотун уурар. Чуолаан, экологияҕа – үлэ биир дьоһуннаах уонна суолталаах хайысхатын быһыытынан. Түгэнинэн туһанан, аахсыйаҕа кыттыбыттарга, МГОК юридическай отделыгар уонна биһиэхэ тиэрдээччигэ Армен Амброяҥҥа махталбын тириэрдэбин.

Сибиир дьаабылыката – элбэх сыллаах отонноох мас, кыһыны тулуйар көрүҥ. Кинини өссө “сибирика”, “отонноох яблоня” диэн ааттыыллар, отонноро бытархайдар, отону санаталлар. Аата итинтэн тахсыбыт. Маннык мастар биһиэхэ Мииринэйгэ ботаническай саадка үүнэллэр. Мастар 5-10 миэтэрэ үрдүктээх буолаллар. Маҥан сибэккилээхтэр. Отонноро төгүрүктэр, быһа холоон, 1 сантиметрга тиийэ эргимтэлээхтэр. Яблоня үксүгэр бэһис сылыгар силигилиир уонна астанар. Билигин, кылаабынайа, мастарбыт ылсыахтарын наада, тиһигин быспакка уу кутуохтара уонна көрүөхтэрэ-истиэхтэрэ. Биһиэхэ быһаарбыттарынан, ити үлэнэн “Кристина” сибэкки солуона дьарыктаныаҕа. Хас да сылынан храмовай сквергэ отонноох мастар силигилии үүнүөхтэрэ.

Бэлэмнээтэ Надежда Егорова

+1
0
+1
0
+1
0
+1
0
+1
0
+1
0
+1
0