Саха сиригэр «Экология» национальнай бырайыак чэрчитинэн, «Ыраас дойду» бырайыагынан элбэх үлэ үмүрүтүллэр. Ол курдук, Мииринэй уонна Бүлүү куораттар сыбаалкаларын суох оҥоруохтара (рекультивация). Билиҥҥи туругунан бырайыактыыр докумуоннарын бэлэмнээһин барарын туһунан СӨ экологияҕа, ойууру туһаныыга уонна ойуур хаһаайыстыбатыгар миниистирин солбуйааччы Сергей Сивцев иһитиннэрдэ.
«Бу бырайыак оҥорон таһаарыыттан хаалар тобохтору уонна докумуона суох сыбаалкалары суох оҥорууга аналлаах. Бүгүҥҥү күҥҥэ тустаах сыбаалкалары суох оҥорууга аналлаах бырайыактыыр докумуоннарын бэлэмниибит. Ол эбэтэр, сыбаалкалары суох гынар үлэни ыллыбыт да ыытар хайдах да табыллыбат. Барыта былаан быһыытынан барыахтаах. Үбэ көрүлүннэ, онон сотору бу боппуруос быһаарыллыаҕа», — диэн Сергей Сивцев иһитиннэрдэ.
Санатар буоллахха, Бүлүү уонна Мииринэй куораттар сыбаалкалара 2024 сыл бүтүүтэ суох оҥоһуллуохтаахтарын туһунан эрдэ иһитиннэрбиттэрэ. Былаан быһыытынан Саха сиригэр барыта бөҕү-сыыһы наардыыр 29 эбийиэк, бөҕү-сыыһы суох оҥорор 13 эбийиэк уонна тобохтору уурар 17 эбийиэк тутуллуохтаахтар. Оттон Дьокуускай куоракка Бүлүүлүүр суол 27-с км кытаанах бөҕү-сыыһа уурар, мунньар полигон уонна бөҕү-сыыһы уматар анал ыстаансыйа баар буолуохтара.
Александр Тарасов, edersaas.ru