Алмаастаах дойду килбэйэр киинигэр Мииринэй куоракка 21,8 миллиард солкуобай суумалаах саҥа аэропуорт ситимэ аны үс сылынан тутуллан дьэндэйэн тахсыаҕа. Ол харчытын бүддьүөттэн уонна атын сиртэн үбүлүөхтэрэ. 10,4 миллиард солкуобайы «АЛРОСА» хампаанньа, 1 миллиарды «РФ ОрВД Госкорпорацията» биэриэхтэрэ. Салгын тырааныспарын хааччыйар саҥа аэропуорт 2022 сылга тутуллан бүтүөҕэ.
edersaas.ru
2018 сыл саҥатыгар көтөр ааллары көрсөр уонна атаарар улахан уораҕай бырайыагын оҥорорго аһаҕас күрэх биллэрбиттэрэ. Түмүктүүр биэтэккэ кыайыылааҕынан «Ленааэропроект» судаарыстыбаннай институт тахсыбыта. Арассыыйа Главгосэкспертизата бырайыагы тургутан көрбүтүн кэнниттэн бу сыл бүтүүтүгэр үбүлээһин харчыта түһүөхтээх.
Бырайыак таһынан, алмаастаах хампаанньа бэйэтин үбүнэн 8,1 миллиард солкуобайга аэропуорт инфраструктуратын эбийиэктэрин, 1,4 миллиард солкуобайга инженернэй ситимнэри уонна 0,6 миллиард солкуобайга массыына киирэр суолун туттарыаҕа. Федеральнай бүддьүөт аэродром инфраструктуратын үбүлүөҕэ.
«Бырайыагы судаарыстыба эмиэ кыттыгас үбүлүүрүн туһунан Арассыыйа Тырааныспарын министиэристибэтэ иһитиннэрбитэ. Мииринэй куорат аэропуордун тутуу Саха сирин арҕаа улуустарыгар тыын суолталааҕын бэлиэтээн туран, 2024 сылга диэри магистральнай инфраструктураны саҥардыыны уонна кэҥэтиини РФ бырабыыталыстыбата бигэргэппит биир кэлим былааныгар киирбитэ», — диэн иһитиннэрдэ «АЛРОСА» генеральнай дириэктэрин солбуйааччы Сергей Барсуков.
Аэропуорт тутуутун алмаастаах хампаанньа 100% кыттыгас тэрилтэтэ «Мииринэй аэропуорда» ХЭТ уонна «Гражданскай аэропуортар дьаһалталара» ФГУП иилээн-саҕалаан ыытыахтара.
Саҥа аэропуорт ситимэ билиҥҥи аэропуортан хотугулуу-илин үс килэмиэтирдээх сиргэ тутуллуоҕа. ИКАО II түһүмэҕэр эппиэттиир 2860х44 миэтэрэ иэннээх сөмөлүөт түһэр-көтөр балаһата, араас кылаастаах көтөр суудуна 18 миэстэлээх турар сирэ, биир чааска 300 киһини көрсөр-атаарар аэровокзал, 1500 туонна авиационнай уматыгы харайар заправка ситимэ, таһаҕас терминала, ыксаллаах быһыы-майгы үөскээтэҕинэ саахалы туоратар, быыһыыр ыстаансыйа о.д.а. эбийиэктэр тутуллуохтара.
«Айанньыттарга табыгастаах буоллун диэн холбоһук галереяны кытта ситимниир икки телескопическай трап көтөр уонна көтөн кэлбит дьону тэҥинэн хааччыйыаҕа. Аэропуорт расписаниетын быһыытынан, сарсыарда өттүгэр кэлии-барыы элбэх, ордук сыыдам буолуоҕа. Эрэгийиэннээҕи экэниэмикэ сайдан, инникитин дойду иһигэр оҥоһуллубут сөмөлүөттэр көтүөхтэрэ. Мииринэйгэ диэри айаны судаарыстыба субсидиялыыр, онон салгын тырааныспарынан туһанар дьон ахсаана элбиэҕэ. Ыраах айаннааччылар Москванан эргийбэккэ чугас Новосибирскайга уонна Красноярскайга баар аан дойду араас хайысхатынан көтөр аэропуортарга тохтоон ааһыахтара», — диир аэропуорт тутуутун бырайыагын салайааччы Олег Кочанов.
Ону таһынан, бырайыак быһыытынан, «АЛРОСА» дойду киин куораттарыгар уонна өрөспүүбүлүкэ иһинэн көтөр авиалинияларын хааччыйар тирэх авиахампаанньатын сирдээҕи инфраструктуратын саҥардыахтара.
Мииринэй аэропуорда РФ национальнай аэродромнарын ситимнэрин ахсааныгар киирэр. Алмаастаах дойду салгын тырааныспарын хааччыйар уораҕайын саҥардыы туһунан кэпсэтии аан бастаан 2004 сыллаахха «АЛРОСА» этиитинэн көтөҕүллэ сылдьыбыта. 2010-2011 сылларга түһэр-көтөр балаһаны уонна аэропуорт сирдээҕи инфраструктуратын тутуу бырайыага оҥоһуллан, 2012 сыллаахха тутуу саҕаланан испитэ эрээри, икки сылынан үбүлээһин кыаллыбакка, тохтоон хаалбыта. 2018 сыл тохсунньутугар хампаанньа бырайыагы сөргүтэн, РФ бырабыыталыстыбата саҥа аэропуорт тутуутун кыттыгас үбүлүүрүгэр Тырааныспар министиэристибэтигэр этии киллэрбитэ.
«Саҥа аэропуорт тутуутун үбэ «АЛРОСА» инвестиционнай бырагырааматыгар киирбитэ син ыраатта, онно көрүллүбүт үп-харчы кээмэйэ уларыйбат, 2018 сыллааҕы көрдөрүүнү быйылгы инвестбырагыраама куоһарбат», — диэн чуолкайдаата Сергей Тахиев, хампаанньа корпоративнай үпкэ управлениетын начаалынньыга.
Марианна Тыртыкова, «Саха сирэ», edersaas.ru