Мииринэйгэ оҕолору кыраларыттан тулалыыр эйгэлэрин таптыырга, харыстыырга үөрэтэллэрэ-такайаллара харахха тута быраҕыллар. Элбэхтэн биири холобурдаатахха, оҕолор быйыл чыычаахтарга анаан ураты аһыыр сирдэри оҥорбуттар. Бу туһунан Мииринэйдээҕи айылҕа харыстабылын кэмитиэтиттэн иһитиннэрбиттэр.
Мииринэй куорат 1 №-дээх оскуолатын бастакы кылааһын үөрэнээччилэрэ чыычаахтары күндүлүүргэ сүбэлэспиттэр. Итиэннэ тулалыыр эйгэни үөрэтэр уруоктарыгар тугу оҥордоххо көтөр кынаттаахтар аһыылларыгар ордук табыгастаах буолуоҕун толкуйдаабыттар. Хаһаайыстыбаҕа туттуллар төгүрүк кумааҕы иилэри бурдуктан оҥорбут тиэстэлэринэн сыбаабыттар уонна онтуларыгар куруппаны сыһыарбыттар.
Айылҕа харыстабылын кэмитиэтин үлэһиттэрэ бу оскуола кэллэктиибэ тулалыыр эйгэ харыстабылыгар сыһыаннаах тэрээһиннэри тиһиктээхтик оҥорорун, тиэмэлэринэн уруоктарга, кылаас чаастарыгар, тэрээһиннэригэр кэмитиэт иниспиэктэрдэрин куруук ыҥыралларын бэлиэтииллэр. Соторутааҕыта бастакы кылаас үөрэнээччилэрэ «Алмаастаах кыраай от күөҕэ пионердара» буолар баҕалаахтарын биллэрбиттэр.