Оруобуна отут ордугуна үс сыллааҕыта, Мииринэй куорат тэриллибитэ 25 сылыгар, оччотооҕу алмааһы хостооччулар инники кэм дьонугар анаан сурук суруйбуттара. Онтуларын тимир турба иһигэр уган баран, “кэм капсулата” диэн ааттаан, куорат пааркатыгар обелиск анныгар кистээбиттэрэ.
Дьыл-хонук ааспыта. Мииринэй олохтоохторо ол капсула туһунан умнан кэбиспиттэрэ. Арай биирдэ суруналыыс Иванна Филиппова оройуон хаһыатын арыйталыы олорон, “кэм капсулатын” кистээбиттэрин туһунан суруйууну булан аахпыта. Кини кэнники ол капсуланы хостообуттарын дуу, суоҕун дуу туһунан ыйыталаһа сатаабыта да, ким да билбэт этэ.
Ол эрээри, суруналыыс ирдэһэн булан тэйэргэ соруктаммыта. Оччотооҕу үлэлээбит дьонтон ыйыталаһан, архыыптан кинохроника каадырдарын булбута. Иванна билигин Москваҕа олорор Социалистическай Үлэ Дьоруойа Раиса Томиловаҕа эрийбитэ: “Ол капсула чопчу ханна кистэммитин туһунан ким да билбэт. Эн өйдүүгүн дуо?”. Онуоха 1984 сыллаахха суругу үрдүк трибунаттан дорҕоонноохтук аахпыт Раиса Томилова кистэммит сирин олус үчүгэйдик өйдүүр буолан биэрбитэ.
Соторутааҕыта Мииринэйгэ “кэм капсулатын” хостооһун уонна саҥа капсуланы угуу сиэрэ-туома буолла. Манна алмаас хостооһунун бэтэрээннэрэ, «АЛРОСА» бэрэстэбиитэллэрэ, дьаһалта үлэһиттэрэ уонна куорат олохтоохторо кыттыыны ыллылар. Дьиктитэ диэн, бу кэмҥэ «Якуталмаз» трест тэриллибитэ 60 сылын, “АЛРОСА” хампаанньа 25 сылын бэлиэтиир үөрүүлээх тэрээһиннэр ыытылла тураллара.
Манна Москваттан Раиса Томилова көтөн кэлэн, кыттыыны ылла. Аспаалга хам сыһыарыллыбыт капсуланы анал тэрилинэн алдьатан ыллылар. Ол кэнниттэн капсуланы бэркэ долгуйбут Раиса Томилова күлүүһүнэн арыйда. Ол суругу аахпыттарын кэннэ, куорат сэбиэтин бэрэссэдээтэлэ Ольга Путинцева кэлэр көлүөнэҕэ анаммыт саҥа суругу ааҕан иһитиннэрдэ. Суругу аны 25 сылынан хостуурга туһаайдылар.
Бу кэнниттэн суругу уонна “флешканы” капсулаҕа угар чиэс “Мир” рудник учаастагын электромеханига Александр Чернятьевка тигистэ. Капсула кистэммит сирин туһунан информацияны уонна 1984 сыллаах суругу олохтоох кыраайы үөрэтэр мусуойга туттардылар.
Ангелина ВАСИЛЬЕВА, “Саха сирэ” хаһыат, edersaas.ru