Мииринэйгэ Бырабыыталыстыба түмүктүүр онлайн-отчуотугар вице-премьер Ольга Балабкина оройуоҥҥа нэһилиэнньэ ахсаана кыччаан иһэрин эттэ.
“Мииринэй улууһа өрөспүүбүлүкэ экэниэмикэтигэр биллэр кылаатын киллэрэр. Бу бэйэтин толору хааччынар улуус, ол эрээри, араас кыһалҕалар манна эмиэ бааллар. Сүрүн кыһалҕанан улууска демография көрдөрүүлэрэ намтааһына буолар. Өрөспүүбүлүкэ үрдүнэн демография көрдөрүүлэрэ ортотунан сыллата үрдүү тураллар. Онон улууска бу кыһалҕа баара хомолтолоох”, — диэтэ Ольга Балабкина. Статистика көрдөрөрүнэн, 2021 сылга Мииринэй улууһугар оҕо төрөөһүнүн көрдөрүүтэ 2020 сылы кытта тэҥнээтэххэ 1,1% (1000 олохтооххо 9,8-тан 8,7-ҕэ диэри) намтаабыт.
Улууска демография мөлтөх көрдөрүүтүн биир биричиинэтинэн Мииринэйгэ быраастарынан хааччыллыы мөлтөҕө буолар. “Төһө даҕаны 9 сыл иһигэр “Земскэй доктор” уонна “Земскэй биэссэр” федеральнай бырагыраамалар чэрчилэринэн Мииринэй улууһугар 14 быраас уонна 5 биэссэр тиийбитин иһин, бырааһынан толору хааччыллыы ситиһиллэ илик”, — диэтэ вице-премьер уонна бу кыһалҕаны муниципальнай тэриллиилэри кытта бииргэ кыттыһан быһаарыыга сыал-сорук быһыытынан туруорда.
Бэлиэтээн эттэххэ, Мииринэй улууһугар доруобуйа харыстабылын сайыннарыыга аналлаах бырагыраама ылыллан «АЛРОСА» хампаанньа көмөтүнэн ыытылла турар.
Олохтоохтор былырыыҥҥы туруорсууларынан, доруобуйа харыстабылын эйгэтигэр туруоруллубут сыаллар быһаарылла тураллара бэлиэтэннэ. Мииринэй киин балыыһатыгар уонна Айхал куораттааҕы балыыһатыгар “суһал көмө” массыыналара атыылаһыллыбыттар, Бырабыыталыстыба таһымыгар Мииринэй улууһугар 2021-2025 сылларга доруобуйа харыстабылын сайыннарыы стратегията бигэргэтиллибит. Айхал куораттааҕы балыыһатын сылааһынан хааччыйыы боппуруоһа быһаарыллыбыт, Мииринэй киин балыыһатыгар магнито-резонанснай томограф атыылаһыыта быһаарылла турар.
Отчуот кэнниттэн улуус олохтоохторо бэйэлэрин ыйытыыларын биэрдилэр, баҕа санааларын тиэртилэр. Сайыҥҥы кэмҥэ дьону тиэйии кыһалҕата, хаарбах дьиэттэн көһөрүү, тыа хаһаайыстыбатын боппуруостара уонна да атын тыын боппуруостар дьүүлгэ тахсан ырытылыннылар, боротокуолга киирдилэр.
«Саха сирэ» хаһыат, edersaas.ru
Хаартыска sakha.gov.ru