Мииринэй сайдыытыгар саҥа былаан оҥоһуллуоҕа

Бөлөххө киир:

Мииринэй оройуонун биир кэлим сайдыытын былаана оҥоһуллуоҕа. Бу туһунан бүгүн Ил Дархан Айсен Николаев оройуон салалтатын кытары мунньахтыырыгар бэлиэтээн эттэ.

Мииринэй оройуонун 2030 сылга диэри сайдыытын стратегиятыттан уратыта диэн бу докумуон тирээн турар кыһалҕалары быһаарыыга туһуланыаҕа. Чуолаан суолу-ииһи оҥоруу, сөмөлүөтүнэн көтүү билиэтигэр чэпчэтиини киллэрии, үөрэхтээһин эйгэтин сайыннарыы, каадыры бэлэмнээһин курдук сытыы боппуруостар көтөҕүллүөхтэрэ.

– Кэлиҥҥи уонча сыл иһигэр оройуоҥҥа доруобуйа харыстабылыгар, үөрэхтээһиҥҥэ, тырааныспар эйгэтин сайыннарыыга син үлэ барбыта да, билигин да бу ааттаммыт эйгэлэргэ бытаарыы көстөр. Онон бу кэлэр биир-икки сыл иһигэр туох үлэ барыахтааҕын чопчу ыйан туран үлэни торумнуохпутун наада, – диэн бэлиэтиир Ил Дархан.

Кини этэринэн, бу докумуону оҥорууга олохтоохтор бэйэлэрэ төһүү буолуохтаахтар. Ону таһынан олохтоох салалтаҕа манна үлэлии-хамсыы сылдьар улахан хампаанньалар күүс-көмө буолаллара ирдэниллэр. Бу ордук “АЛРОСА” хампаанньаҕа сыһыаннаах. Генеральнай дириэктэр Сергей Иванов иһитиннэрбитинэн, хампаанньа бииргэ үлэлэһэргэ бэлэм.

– Биһиги Мииринэй оройуонун биир кэлим сайдыытын былаанын толору өйүүбүт. Нэһилиэнньэ хас биирдии кыһалҕата болҕомто киинигэр сылдьыахтаах, – диэн этэр кини.

Манна даҕатан эттэххэ, “АЛРОСА” хампаанньа улуус социальнай бырайыактарыгар куруутун үбүнэн-харчынан көмөлөһөр. Кэлиҥҥи түөрт сылга хампаанньа бу бырайыактарга укпут харчыта 6 миллиард солкуобайга тэҥнэһэр. Өссө 2 млрд солкуобай оройуон бүддьүөтүгэр дивидент быһыытынан түспүтэ. Хампаанньа биир улахан бырайыагынан Мииринэйгэ саҥа аэропорт тутуутун үбүлээһинэ буолар. Манна барыта 11 млрд солкуобайы ороскуоттуохтаах.

“АЛРОСА”-ны таһынан өссө “РНГ”, “ТаасҮрэх-Нефтегазодобыча”, “Якутскэнерго” хампаанньалар былааҥҥа кыттыһар санаалаахтар.

Аграфена КУЗЬМИНА, “Саха сирэ” хаһыат

+1
0
+1
0
+1
0
+1
0
+1
0
+1
0
+1
0