Саҥа сылга үктэнэн баран, оройуоҥҥа биир тыһыынча киһи коронавирус дьаҥыттан харыстанар быһыыны ылла. Бу туһунан СИА-ҕа Мииринэйдээҕи киин балыыһа кылаабынай бырааһа Татьяна Стручкова иһитиннэрдэ.
«Биһиэхэ 1000 вакцина дозата тохсунньу 15 күнүгэр кэлбитэ. Ылыммыт былааммытынан, 1000 киһиэхэ быһыы оҥордубут. Бу күннэргэ эбии вакцинаны күүтэбит. Мин тус бэйэм быһыыны ылбытым, туругум үчүгэй. Онон доруобуйаҕа туһалаах быһыыны ылан, бэйэҕитин уонна чугас дьоҥҥутун харыстыыргытыгар ыҥырабын», — диэн эттэ Татьяна Стручкова.
Мииринэй оройуонугар быһыыны туруорууга тоҕус былаһаакка үлэлиир: алта кэбиниэт — Мииринэй куоратыгар, ону тэҥэ Чернышевскай, Светлэй уонна Алмазнай бөһүөлэктэргэ анал кэбиниэттэр аһыллан үлэлииллэр. Быһыы иккитэ бэриллэр, 21 хонук буолан баран иккистээн бэриллэр.
Елена ПОТОЦКАЯ, «Саха сирэ» хаһыат, edersaas.ru