Мииринэй оройуона Ньиэп-гаас бастакы форумун көрсөргө толору бэлэм. Сүрүн боппуруостары быһаарбыттар. Бу туһунан муниципалитет баһылыгын көмөлөһөөччүтэ Константин Коробков иһитиннэрдэ.
Тэрээһиҥҥэ 200 киһи кыттыаҕа.
“Мииринэй оройуонугар маннык таһымнаах тэрээһини өрүү ыытабыт. Онон үөрүйэхпит. Ньиэп-гаас бастакы форума – бу Саха сиригэр ураты түгэн. Оройуоҥҥа маны ыытарга сөптөөх инфраструктура баар. Форум түмүгэ өрөспүүбүлүкэ инники соруктарын толорорго төһүү буолуоҕа”, — диэтэ Константин Коробков.
Кини форум бырагыраамата киэҥин бэлиэтээтэ. Ол курдук, “Таас Үрэх Нефтегазодобыча” хампаанньа баахтабай бөһүөлэгин арыйыахтара. Ону тэҥэ “РНГ” хампаанньа Орто Ботуобуйатааҕы ньиэп-гаас конденсаттаах сиргэ бырамыысыланнас учаастагын үлэҕэ киллэриэхтэрэ. Гааһы таҥастааһын боппуруостарыгар, ньиэп-гаас салаатын сайыннарыыга “төгүрүк остуоллар” ыытыллыахтара.
Коробков этэринэн, 200 кыттааччы кэлэрэ күүтүллэр, чуолаан, Саха сирин Ил Дархана Айсен Николаев, министиэристибэлэр үлэһиттэрэ, бырамыысыланнас бөдөҥ хампаанньаларын топ-менеджердэрэ. Арассыыйа Судаарыстыбаннай Дууматыттан, федеральнай структураларыттан ыалдьыттар кэлиэхтэрэ.
Санатан эттэххэ, Ньиэп-гаас бастакы форума Мииринэй оройуонугар атырдьах ыйын 29-30 күннэригэр ыытыллыаҕа. Биисинэс, былаас уонна уопсастыбаннас ыллыктаах кэпсэтиитигэр форум табыгастаах былаһаакканан буолуоҕа.
Дьулус Борочков, СИА