Мииринэй оройуона — Ил Дархан хонтуруолугар

Ааптар: 
Бөлөххө киир:

Бэҕэһээ Ил Дархан Айсен Николаев Мииринэй оройуонугар эпидемиологическай балаһыанньа тула мунньаҕы ыытта. Айсен Сергеевич бүтэһик нэдиэлэлэргэ бу оройуоҥҥа коронавирус тарҕаныыта улааппытын бэлиэтээтэ. Сотору кэминэн үөрэх дьыла саҕаланарынан уонна дьон уоппускаттан кэлэрэ элбээбитинэн, суһал дьаһаллары ылынар мунньах ааста.

Ил Дархан сорудаҕынан Мииринэйгэ СӨ Доруобуйа харыстабылын министиэристибэтэ Ольга Балабкина салалтатынан икки күн үлэлээтэ. Вице-премьер этэринэн, быһыыны ылыы тэтимирэрин туһуттан, оройуоҥҥа 3000 доза «Спутник Лайт» вакцина кэлбит. Ону кытта дьаҥы бохсууга былааннаах үлэ ыытылларыгар кэккэ дьаһаллар ылыныллыбыттар.

Мииринэйдээҕи Роспотребнадзор салайааччытын э.т. Татьяна Тимакова ааспыт нэдиэлэҕэ 30-40 саастаах дьон ыалдьара элбээбитин эттэ. Иккис миэстэҕэ 50-64 саастаах дьон, үһүс — 18-29 саастаах дьон. Бу чинчийии санитарнай-эпидемиологическай быраабылалары тутуспат буолууттан тахсаллара саарбахтаммат.

Доруобуйа харыстабылын миниистирэ Елена Борисова иһитиннэрбитинэн, Мииринэй киин балыыһатыгар 120 куойка, Айхалга 45 куойка баар. Маны наада буоллаҕына, 250-ҥэ, 100-кэ диэри элбэтиэхтэрин сөбүн эттэ. Итиэннэ эмп, тус харыстанар сириэстибэ саппааһа баарын, ПЦР тутар лабораториялар тустаах таһымҥа үлэлии сылдьалларын туһунан Ил Дархаҥҥа кэпсээтэ.

Мунньах түмүгэр Ил Дархан хааччахтыыр миэрэлэри тутуһууну күүскэ хонтуруоллуурга, быһыыны ылыыны тэтимирдэргэ, нэһилиэнньэни тустаах информациянан хааччыйарга соруйда.

Ил Дархан уонна Бырабыыталыстыба дьаһалтатын пресс-сулууспата.  

Андрей Сорокин (СИА) хаартыската.

+1
0
+1
0
+1
0
+1
0
+1
0
+1
0
+1
0