Мииринэйгэ ыарыы тарҕаныаҕыттан тоҕус киһи ыалдьыбыта бэлиэтэммит. Аҕыс баахтанан үлэлиир киһи уонна биир олохтоох киһи коронавируһунан ыалдьыбыттар.
Саамай бастакынан ыалдьыбыт киһи үтүөрэн, балыыһаттан тахсыбыт. Кини муус устар ортото Москваттан кэлэн баран коронавируска сутуллубутун билбит.
Оттон билигин балыыһаҕа аҕыс киһи баар. Икки киһини Чайыҥдаттан аҕалбыттар, оттон алта киһи «РНГ» тэрилтэ үлэһитэ. Кинилэри ааспыт сууккаҕа ыалдьыбыттарын билэн, балыыһаҕа киллэрбиттэр.
Оройуоннааҕы суһал штаб иһитиннэрэринэн, хантаактаах дьон быһаарыллыбыттар. Мииринэй стационарыгар 14 киһи киирбит. Аҕыс ыарыһаҕы кытта хантаактаахтар эмиэ кэтэбилгэ сылдьаллар. Өссө 30 киһи балыыһа провизорнай салаатыгар сытар, бу Чайыҥданы уонна «РНГ» тэрилтэни кытта сибээстээх дьон.
Оройуон үрдүнэн 408 киһи бэйэни хааччахтаан олорор, обсерваторга 176 киһи баар.
Мииринэйгэ лаборатория үлэлиир. Манна дьаҥ кэмигэр 7 тыһыынча анаалыһы оҥорбуттара биллэр диэн СӨ суһал штаба иһитиннэрэр.
edersaas.ru