“Саха сиригэр оҥоһулунна” бырайыак чэрчитинэн, балаҕан ыйын 7-8 күннэригэр Мииринэйгэ олохтоох ас-үөл быыстапка-дьаарбаҥката бэһис төгүлүн ыытыллыаҕа.
Санатан эттэххэ, 2017 с. саас тэриллибит бастакы быыстапка-дьаарбаҥкаҕа Бүлүү эҥээр улуустар соҕотуопкалыыр-астыыр тэрилтэлэрэ, Дьокуускайтан “Мясной двор”, “Сахаагропродукт” кэпэрэтииптэр, “Туймаада-Агроснаб” ААУо, “Хатастааҕы сибиинньэ комплексата” ХЭУо кыттаннар, илдьибит бородууксуйаларын батаран, бэркэ биһирээн кэлбиттэрэ. Онон кэлиҥҥи дьаһалларга кыттааччы ахсаана да элбээбитэ, саха аһыгар-үөлүгэр маастар-кылаастар да тэриллибиттэрэ.
Бу нэдиэлэ бүтүүтэ ыытыллар быыстапка-дьаарбаҥка эмиэ элбэх кыттааччылаах буолуоҕа. Ол курдук, ас-үөл дегустацията уонна олохтоохтор үүннэрбит оҕуруоттарын аһын дьаарбаҥката тэриллиэхтэрэ. Маннык дьаһаллар кэлэр өттүгэр Мииринэй улууһугар “Алмаастаах түбэ агрокластера” диэн тыа хаһаайыстыбатын бородууксуйатын оҥорон таһаарааччылар ситимнэрин тэрийэргэ тирэх буолуохтара диэн Тыа хаһаайыстыбатын министиэристибэтин Астыыр-таҥастыыр бырамыысаланнаска департамена иһитиннэрэр.
Раиса Сибирякова, «Саха сирэ» edersaas.ru