Итирдэр утаҕы ыймахтаан, өй туймаарыйбыт кэмигэр кыра да сылтах ыарахан, көннөрүллүбэт содулга тиэрдиэн сөп. Киһи сааһыттан, кимиттэн-тугуттан тутулуга суох.
Бүлүү улууһугар 40-ча сыл олорбут ыалга оннук алдьархай ааҥнаабыта — аҕам саастаах дьахтар эриниин аһыы утаҕы иһэ олорон кыыһырсыбыттар: эрэ «мииниҥ минньигэһэ суох!» — диэн ойоҕун сэмэлээччи буолбут, устунунан ол-бу диэн үөхпүт. Онуоха дьахтар тулуйан истэ сатаан баран, эрин көхсүгэ быһаҕынан анньан өлөрбүт.
Бу холуобунай дьыала суут мунньаҕар көрүллүбүт. 62 саастаах сууттанааччы дьахтар буруйун толору билиммит, оҥорбутун кэмсиммит. Суут ону итиэннэ сымнатар өрүттэри, ол иһигэр, аҕам сааһын учуоттаан, дьахтары 6 сылга уопсай эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп. Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.